چارسدہ: پولیس سٹیشن عمرزئی کی حدود اخون ڈھیری میں پولیس وین کے قریب خودکش دھماکہ ہوا، تاہم دھماکے سے پولیس اہل کار اور پولیس وین محفوظ رہے۔
جائے وقوع پر رش نہ ہونے کے باعث دھماکے سے بمبار کے سوا کوئی دوسرا جانی نقصان نہیں ہوا۔ ابتدائی اطلاعات کے مطابق خودکش بمبار نے پولیس وین گزرنے کے بعد خود کو دھماکے سے اُڑایا۔ دھماکے کی آواز دور دور تک سنی گئی۔
خودکش دھماکے کے بعد پولیس کی بھاری نفری موقع پر پہنچ گئی، جس نے شواہد اکٹھے کرنے کے بعد علاقے کی ناکہ بندی کرکے تحقیقات شروع کردی ہیں ۔۔
پولیس کے مطابق جائے وقوع سے کچھ پیسے اور شناختی کارڈ بھی ملا ہے۔ جائے وقوع پر بم ڈسپوزل سکواڈ، پولیس کی بھاری نفری اور قانون نافذ کرنے والے اداروں کو طلب کرنے کے بعد علاقے میں سرچ آپریشن شروع کردیا گیا ہے۔
پولیس حکام نے کہا ہے کہ واقعے میں موٹر سائیکل سوار کے سوا کوئی جانی نقصان نہیں ہوا۔
