بنوں میں دہشت گردوں نے 2 پولیس تھانوں کو نشانہ بنایا جہاں نامعلوم موٹر سائیکل سواروں نے خوجڑی پولیس چوکی پر دو ہینڈ گرنیڈ سے حملہ کیا، تاہم خوش قسمتی سے کوئی جانی نقصان نہیں ہوا ۔
پولیس کے مطابق علاقے میں سیکیورٹی سخت کر دی گئی ہے اور حملہ آوروں کی تلاش جاری ہے ، اس واقعے کے بعد گاؤں کے لوگوں نے بھی چوکی کی حفاظت کے لیے خود کو مسلح کر لیا اور اعلان کیا کہ خوجڑی پولیس چوکی کی حفاظت علاقے کے مشران کریں گے ۔
پولیس کے مطابق بنوں کے بکاخیل پولیس سٹیشن اور غوری والہ پولیس سٹیشن پر بھی حملے کیے گئے جہاں پولیس اور دہشتگردوں کے درمیان فائرنگ کا تبادلہ بھی ہوا ۔
پولیس کا مزید کہنا تھا کہ دہشت گردوں نے تین مختلف مقامات پر بیک وقت حملے کیے جس سے علاقے میں خوف و ہراس پھیل گیا ۔
پولیس اور سیکیورٹی ادارے حملہ آوروں کی تلاش میں ہیں اور علاقے میں سرچ آپریشن جاری ہے۔ عوام نے پولیس کے ساتھ تعاون کا اعلان کیا ہے تاکہ دہشت گردوں کے عزائم کو ناکام بنایا جا سکے ۔
