اسلام آباد: قومی سلامتی کمیٹی اجلاس میں عدم شرکت کے اعلان پر وزیر دفاع خواجہ آصف نے تحریک انصاف کو آڑے ہاتھوں لیتے ہوئے کہا ہے کہ ’’خان نہیں تو پاکستان نہیں‘‘ تحریک انصاف کا نصب العین ہے ۔
سماجی رابطے کی ویب سائٹ ’’ایکس‘‘ پر خواجہ آصف نے لکھا کہ پی ٹی آئی نے آج اس بات کو ثابت کر دیا ہے کہ عمران خان اول اور آخر ان کی ترجیح ہے ۔
وزیر دفاع خواجہ محمد آصف کا کہنا تھا کہ وطن کی سلامتی اور امن پی ٹی آئی کے لیے اہمیت نہیں رکھتے ۔
وزیر دفاع نے کہا کہ وطن دہشت گردی کی آگ میں جل رہا ہے اور پی ٹی آئی اپنے مفادات کی سیاست کر رہی ہے، اس سے بڑھ کے وطن دشمنی کیا ہو سکتی ہے ۔
