پشاور: ترجمان سی ایم ہاؤس خیبرپختونخوا نے کہا ہے کہ وزیراعلیٰ علی امین گنڈاپور کی خصوصی ہدایات پر ضلع کرم کیلئے صوبائی حکومت کی ہیلی کاپٹر سروس جاری ہے، کرم کا زمینی راستہ کھلنے تک ہیلی کاپٹرسروس جاری رہے گی، جمعرات کے روز ایم آئی 17 کی کرم کے لئے کل چھ پروازیں ہوئیں ۔
انہوں نے بتایا کہ اب تک ہیلی کاپٹرسروس سے مجموعی طور 613 افراد کو ایئر ٹرانسپورٹ سروس فراہم کی گئی، جرگہ ممبران کے علاوہ عام شہری جن میں بچے، خواتین، طلبہ اور مریض شامل ہیں کو سہولت فراہم کی گئی ۔
وزیراعلیٰ علی امین گنڈا پور نے کہا ہے کہ موجودہ صورتحال میں کرم کے شہریوں کو درپیش مشکلات کا بخوبی احساس ہے، صوبائی حکومت کی کوشش ہے کرم کے عوام کو درپیش مسائل جلد سے جلد حل ہوں، امید ہے جلد کرم کے مسئلے کا پرامن حل نکل آئے گا اور وہاں زندگی معمول پر آئے گی ۔
وزیراعلیٰ علی امین گنڈاپور نے امید ظاہر کی کہ جلد کرم کے مسئلے کا پرامن حل نکل آئے گا اور وہاں زندگی معول پر آئے گی، صوبائی حکومت مسئلے کے پر امن اور فریقین کے لئے قابل قبول حل کے لئے حتی الوسع کوششیں کررہی ہے ۔
علی امین گنڈاپور کا کہنا تھا کہ فریقین اور علاقہ عمائدین علاقے کے امن کی خاطر صوبائی حکومت کی کوششوں کا ساتھ دیں، شہریوں کے جان و مال کا تحفظ اور امن و امان کا قیام صوبائی حکومت کی اولین ترجیح اور ذمہ داری ہے ۔
