پاکستان سپر لیگ کے 10ویں ایڈیشن کا میگا ٹورنامنٹ آج سے راولپنڈی میں شروع ہو گا، افتتاحی میچ میں اسلام آباد یونائیٹڈ اور لاہور قلندرز ٹکرائیں گے، تمام کپتان پی ایس ایل کے لیے پرجوش اور ٹرافی جیتنے کیلئے پرعزم ہیں ۔
پی ایس ایل کے 10ویں ایڈیشن کا آغاز راولپنڈی کرکٹ سٹیڈیم میں شاندار افتتاحی تقریب سے کیا جائے گا، رنگا رنگ افتتاحی تقریب بھی لہوگرمائے گی، عابدہ پروین، علی ظفر اور دیگر آواز کا جادو جگائیں گے ۔
اسلام آباد یونائیٹڈ واحد ٹیم ہے جس نے پی ایس ایل 3 مرتبہ (2016، 2018 اور 2024) جیتی ہے جبکہ لاہور قلندرز نے 2 مرتبہ (2022 اور 2023) میں ٹائٹل اپنے نام کیا ۔
سٹار بیٹر بابراعظم پشاور زلمی کو لیڈ کرینگے،اسلام آباد یونائیٹڈ کی قیادت شاداب خان کریں گے جبکہ لاہور قلندرز شاہین شاہ آفریدی کی قیادت میں میدان میں اترے گی ۔
سعود شکیل کوئٹی گلیڈی ایٹرز جبکہ قومی ون ڈے ٹیم کے کپتان محم رضوان ملتان سلطانز کی کپتانی کے فرائض انجام دیں گے ۔
پشاور زلمی کے کپتان بابراعظم کا کہنا ہے کہ اس سیزن میں ہم اس بات پر توجہ مرکوز کر رہے ہیں کہ ہم نے پچھلے دو ایڈیشنز میں کیا کھویا اور انہی غلطیوں کو نہ دہرایا جائے۔ ہم نے بولنگ اور بیٹنگ دونوں شعبوں میں اپنا مرکز مضبوط کیا ہے تاکہ ہم کھیل کے کسی بھی مرحلے پر جدوجہد نہ کریں ۔
دفاعی چیمپئین اسلام آباد یونائیٹڈ کے کپتان شاداب خان کا کہنا ہے کہ شائقین کے سامنے اچھی کارکردگی دکھانے کیلئے پرجوش ہیں ۔
ملتان سلطانز کے کپتان محمد رضوان کا کہنا ہے کہ پی ایس ایل ایک بہت بڑا برانڈ بن چکی ہے کہ ملک کے ہر خاندان میں مختلف ٹیموں کے سپورٹرز ہیں جبکہ تمام شائقین اس لیگ کا پورا سال انتظار کرتے ہیں۔ جو بھی ٹورنامنٹ جیتے گا وہ اس ملک کے لیے کامیاب ہوگا۔
کوئٹہ گلیڈی ایٹرز کے کپتان سعود شکیل کا کہنا ہے کہ گزشتہ چند سیزن کوئٹہ کے لیے اچھے نہیں رہے اور دیگر تمام ٹیموں کی طرح ہم نے بھی معیاری اسکواڈ کو جمع کرنے کی پوری کوشش کی ہے ۔ ہم اس بار اچھا کھیلنے اور شائقین کی تفریح کے لیے پر امید ہیں۔
لاہور قلندرز کے کپتان شاہین شاہ آفریدی کا کہنا ہے کہ پی ایس ایل میں لاہور قلندرز کا ایک اہم مقصد معیاری کھلاڑیوں کی تیاری اور انہیں سامنے لانا رہا ہے اور ہم لیگ کے 10ویں ایڈیشن میں بھی اس مقصد پر قائم رہیں گے۔ امید ہے کہ ہماری ٹیم اس سیزن میں اچھی کارکردگی کا مظاہرہ کرے گی۔
کراچی کنگز کے نائب کپتان حسن علی کا کہنا ہے کہ کراچی کنگز نے اپنی بیٹنگ میں فائر پاور لانے کے لیے اپنا کمبینیشن تبدیل کیا ہے اور ہم ابتدا ہی سے جارحانہ انداز میں کھیلنے کا ارادہ رکھتے ہیں کیونکہ پاور پلے آپ کے جیتنے کے امکانات کو بڑھانے کی کلید ہے ۔
