پی ٹی آئی اتحاد نے پاکستان کی جانب سے افغانستان کے اندر حملوں کی مخالفت کردی ہے۔
قومی اسمبلی میں وزیر دفاع خواجہ آصف نے کہا کہ افغانستان سے دہشتگردی ہوئی تو ہم ضرور جواب دیں گے، عوام اور اپنے ملک کی حفاظت کے لیے ہمیں حق ہے کہ اس کا ضرور جواب دیں۔
اس کے بعد اپوزیشن جماعتوں کی جانب سے ہنگامی اجلاس میں مطالبہ کیا گیا ہے کہ کسی اور ملک کے اندر بالکل بھی مداخلت نہ کی جائے۔
اس حوالے سے اپوزیشن لیڈر عمر ایوب نے قومی اسمبلی میں کہا کہ وزیر دفاع خواجہ آصف نے بیان دیا افغانستان کے اندر حملہ کریں گے،لیکن مزید جنگ اور خرابی کے ہم متحمل نہیں ہو سکتے ہیں،افغانستان کے اندر حملے کا مطلب پورے خطے کو جنگ میں تبدیل کرنا ہے۔
اسد قیصر کے مطابق ہماری خارجہ پالیسی ہے کہ نہ ہی کہیں پر مداخلت کریں گے اور نہ کرنے دیں گے، کے پی اور فاٹا کی معیشت کی بنیاد ہی افغانستان پر ہے، پی ٹی آئی کے افغانستان سے اچھے تعلقات کو استعمال کیا جا سکتا ہے۔
