آج پاکستان اور آئرلینڈ کے درمیان تیسرا فیصلہ کن میچ ہوگا.
آج پاکستان اور آئرلینڈ کے درمیان سیریز کا تیسرا اور فیصلہ کن ٹی ٹوئنٹی میچ کھیلا جائے گا۔پاکستان اور آئرلینڈ دونوں ٹیموں نے ابھی تک ایک ایک میچ میں کامیابی حاصل کر رکھی ہے، ایک ایک میچ جیتنے کی وجہ سے سیریز برابر ہے۔آئرلینڈ نے پہلے ٹی ٹوئنٹی میں 5 وکٹوں سے فتح حاصل کی تھی، جبکہ دوسرے میچ میں پاکستان نے 7 وکٹوں سے کامیابی حاصل کی تھی.گزشتہ روز چیئرمین پاکستان کرکٹ بورڈ محسن نقوی نے ڈبلن میں کرکٹ آئرلینڈ کے چیئرمین برائن میک نیس سے ملاقات کی جس میں ویمنز اور مینز ٹیموں کی باہمی سیریز پر بات چیت کی گئی۔
اس ملاقات میں برائن میک نے پاکستان ٹیم کے آئرلینڈ کا دورہ کرنے پر چیئرمین پی سی بی کا شکریہ ادا کیا اور اس کے ساتھ ہی محسن نقوی کو آئرلینڈ ٹیم کی شرٹ اور کیپ کا سووینیئر پیش کیا۔ دونوں ممالک کی مینز ٹیموں کے ساتھ ویمنز ٹیموں کی باہمی سیریز کرانے پر اتفاق بھی کیا گیا ہے۔برائن میک کے مطابق آئرلینڈ کی مینز ٹیم آئندہ سال اگست ستمبر میں پاکستان کا دورہ کرے گی جبکہ ویمنز کرکٹ ٹیم کے دورہ پاکستان کا بھی جلد جائزہ لیں گے۔
چیئرمین کرکٹ آئرلینڈ نے چیمپئنز ٹرافی 2025 کے پاکستان میں انعقاد کو خوش آئند قرار دیتے ہوئے کہا کہ ہمیشہ پاکستان نے بین الاقوامی ٹورنامنٹس کے لیے بہترین سیکیورٹی فراہم کی ہے۔اس موقع پر چیئرمین پی سی بی نے دورہ آئرلینڈ کیلیے بہترین انتظامات پر آئرش کرکٹ بورڈ کا شکریہ ادا کیا اور کہا کہ آئرلینڈ میں پاکستانی ٹیم کو بہت سپورٹ اور پیار ملا ہے۔
