سابق مشیر خزانہ سلمان شاہ کے خاندان کیخلاف درج مقدمات کا ریکارڈ طلب

لاہورہائیکورٹ نے  سابق آرمی چیف کے داماد اور سابق  مشیر خزانہ سلمان شاہ  اور ان کے خاندان کے ارکان کے خلاف درج مقدمات کی تفصیلات طلب کرلیں۔ لاہور ہائیکورٹ کے جسٹس انوار الحق نے سلمان شاہ اور ان کے خاندان کے افرادکے خلاف درج مقدمات کے ریکارڈ کے لیے دائر  درخواست پر سماعت کی۔ دوران سماعت وکیل نے مؤقف اپنایا کہ سابق مشیر خزانہ سلمان شاہ  کی بیٹی خدیجہ شاہ نےگزشتہ روزگرفتاری دے دی ہے، جو اب ہورہا ہے وہ کبھی اس ملک میں نہیں ہوا۔

دورانِ سماعت عدالت نے استفسار کیا کہ  اب ریکارڈ فراہم کرنےمیں کیا رکاوٹ ہے؟ بعد ازاں عدالت نے سلمان شاہ اور ان کے خاندان کے ارکان کے خلاف مقدمات کی تفصیلات طلب کرلیں۔ واضح رہے کہ لاہور کے جناح ہاؤس میں توڑ پھوڑ اور جلاؤ گھیراؤ کیس میں مطلوب معروف فیشن ڈیزائنر خدیجہ شاہ کوگرفتارکر لیاگیا ہے۔ گزشتہ دنوں خدیجہ شاہ کی آڈیو سامنے آئی تھی جس میں انہوں نے خود کو پولیس کے حوالے کرنے کا کہا تھا مگر پولیس کو گرفتاری دینے کے بجائے وہ گھر سے فرار ہوگئی تھیں۔ خدیجہ شاہ سابق آرمی چیف جنرل آصف نواز جنجوعہ کی نواسی اور سابق مشیر سلمان شاہ کی صاحبزادی ہیں۔