سابق وزیراعظم عمران خان کی اہلیہ بشریٰ بی بی کے سابق شوہر خاور مانیکا نے کہا ہے کہ عمران خان نے پیری مریدی کی آڑ لے کر ہمارا گھر برباد کر دیا۔ نجی ٹی وی کو ایک انٹرویو میں خاورمانیکا نے انکشاف کیا کہ بشریٰ بی بی کی بہن نے چیئرمین پی ٹی آئی کا تعارف بشریٰ سے کرایا تھا جبکہ انہیں اپنی بیوی کی چیئرمین پی ٹی آئی سے ملاقاتوں پر اعتراض تھا، چیئرمین پی ٹی آئی کا ہمارے گھر آنا جانا بڑھتا گیا، چیئرمین پی ٹی آئی کے آنے جانے سے ہمارے گھر والے ڈسٹرب تھے۔
خاور مانیکا نے کہا کہ میری والدہ نے بھی چیئرمین پی ٹی آئی کے گھر آنے پراعتراض کیا تھا، میری اجازت کے بغیر آکر چیئرمین پی ٹی آئی گھنٹوں بیٹھے رہتے تھے، ایک مرتبہ نوکر سے کہہ کر چیئرمین پی ٹی آئی کو اپنے گھر سے نکلوا دیا تھا، بشریٰ بی بی چیئرمین پی ٹی آئی سے ملنے بنی گالا جانے لگی۔ انہوں نے کہا کہ ایک دن فرحت شہزادی عرف گوگی کا میسج آیا کہ بشریٰ بی بی کو طلاق دے دیں، بشریٰ بی بی کو فرحت شہزادی کے ہاتھ طلاق بھجوائی تھی، فرحت شہزادی نے ایک ماہ بعد فون کرکے طلاق کی تاریخ تبدیل کرنے کو کہا، میں نے بشریٰ بی بی کو طلاق 14 نومبر2017ء کو دی تھی۔
خاورمانیکا نے مزید کہا کہ بشریٰ بی بی کا چیئرمین پی ٹی آئی سے نکاح یکم جنوری2018ء کو ہوا، کیا کبھی پیر اور مرید کا نکاح ہوسکتا ہے؟ مجھے اور بچوں کو نکاح یا شادی کا علم ٹی وی پرخبروں سے ہوا۔
خاورمانیکا نے مزید بتایا کہ چیئرمین پی ٹی آئی لاہور والے گھر دو دفعہ آئے، چیئرمین پی ٹی آئی پھر اسلام آباد میں ملاقات کیا کرتے تھے، چیئرمین پی ٹی آئی کا لگاتار آنا جانا شروع ہوگیا تھا، زلفی بخاری اور چیئرمین پی ٹی آئی جب چاہتے تھے گھر آجاتے تھے۔ انہوں نے مزید کہا کہ بشریٰ بی بی میری اجازت کے بغیر کئی بار بنی گالا جاکر گھنٹوں گزارتی تھی۔
خاور مانیکا نے کہا کہ اگر مرشد کے پاس مرید آرہا تھا تومیری بھی تو کوئی عزت تھی، میری اجازت کے بغیر تو ایسا نہیں ہونا چاہئے تھا، مجھے یہی تواعتراض تھا کہ میں خاوند ہوں، جب ان کا نکاح ہوا تو مجھے زلفی بخاری، فرحت شہزادی کے فون آئے، مجھے زلفی بخاری، فرحت شہزادی نے کہا ہمارے مرید نے آگے جاکر وزیراعظم بننا ہے۔
انہوں نے بتایا کہ مجھے ہراساں کیا گیا اور کہا گیا بہتر ہے خاموش رہیں، اب میں تھک گیا ہوں اور چاہتا ہوں سب کچھ بتا دوں، زندگی میں میرے خلاف ایک کیس ہوا ہے اسے بھگتنے کو تیار ہوں، بشریٰ بی بی میرے بچوں کو چھوڑ کرگئی، میری چھوٹی بچی آج بھی روتی ہے۔
