خیبرنیٹ ورک انتظامیہ اور تمام کارکنوں کی جانب سے اہل وطن اور امت مسلمہ کو رمضان مبارک ہو ۔
ملک بھر کے چھوٹے بڑے شہروں میں رحمتوں اور برکتوں کے مہینے رمضان المبارک کا آغاز ہوگیا،ملک کے کونے کونے میں تراویح کا بھی اہتمام کیا گیا ، جس میں بڑی تعداد میں لوگوں نے شرکت کی ۔
پشاور، اسلام آباد، لاہور، کراچی، اور کوئٹہ سمیت مختلف شہروں میں رمضان المبارک کا چاند نظر آیا، کیمرے کی آنکھ نے چاند کے مناظر محفوظ کرلیے ۔
رمضان کا مہینہ شروع ہوتے ہی مساجد کی رونقیں بڑھ گئيں اور ملک بھر میں پہلی تراویح کی ادائيگی کی گئی، جس میں لوگوں نے بڑی تعداد میں شرکت کی ۔
نماز عشا کے بعد مساجد میں تراویح کا سلسلہ رات گئے تک جاری رہا، متعدد شہروں میں مختلف مقامات پر تراویح کا خصوصی اہتمام کیا گیا ۔
اس موقع پر صدر آصف زرداری اور وزیراعظم شہباز شریف نے رمضان المبارک کے آغاز پر قوم کو مبارک باد دی۔ صدر آصف زرداری نے کہا کہ معاشرے میں ایثار و قربانی کے جذبے کو فروغ دیں، ضرورت مند افراد کا خاص خیال رکھیں ۔
وزیراعظم شہباز شریف نے اپنے پیغام میں کہا کہ اپنی دعاؤں میں مقبوضہ فلسطین اور مقبوضہ کشمیر کے مظلوم مسلمانوں کو یاد رکھیں، ہمیں متحد ہو کر ظلم کے خلاف آواز اٹھانی ہے ۔
دوسری جانب سعودی عرب سمیت خلیجی ممالک، یورپ اور امریکا میں آج پہلا روزہ ہے۔ بھارت، سری لنکا اور جاپان سمیت مختلف ممالک میں کل پہلا روزہ ہوگا ۔
