اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسی آپریشن سینٹر (این ای او سی) نے پنجاب اور آزاد جموں و کشمیر کے مختلف اضلاع میں اگلے 12 سے 24 گھنٹوں کے دوران شدید بارشوں کا الرٹ جاری کیا ہے، شدید بارشوں کے باعث شہری و نشیبی علاقوں میں سیلابی صورتحال، ندی نالوں میں طغیانی اور پہاڑی علاقوں میں لینڈ سلائیڈنگ کا خدشہ ظاہر کیا گیا ہے ۔
الرٹ کے مطابق پنجاب کے اضلاع گجرات، گوجرانوالہ، سیالکوٹ، نارووال، لاہور، قصور، جہلم، چکوال، منڈی بہاؤالدین، حافظ آباد، ننکانہ صاحب، چنیوٹ اور پاکپتن میں شدید بارشوں کی پیش گوئی کی گئی ہے ۔
اس کے علاوہ آزاد کشمیر کے اضلاع نیلم ویلی، باغ، کوٹلی، راولاکوٹ، مظفرآباد اور حویلی میں وقفے وقفے سے بارش متوقع ہے، جو نشیبی علاقوں میں سیلاب اور پہاڑی علاقوں میں لینڈ سلائیڈنگ کا باعث بن سکتی ہے ۔
این ڈی ایم اے نے خبردار کیا ہے کہ شدید بارشوں سے پہاڑی نالوں میں پانی کا تیز بہاؤ رابطہ سڑکوں پر ٹریفک کی روانی کو متاثر کر سکتا ہے۔ دریائے ستلج میں بہاؤ کے اضافے اور ممکنہ سیلابی صورتحال کے پیش نظر این ڈی ایم اے نے پہلے ہی الرٹ جاری کر رکھا ہے ۔
این ڈی ایم اے کا مزید کہنا ہے کہ متعلقہ اداروں نے ستلج کے قریبی علاقوں سے بڑے پیمانے پر انخلاء کی کارروائیاں شروع کر دی ہیں ۔
پنجاب ڈیزاسٹر مینجمنٹ اتھارٹی (پی ڈی ایم اے)، ریسکیو 1122 اور پاک آرمی کے انجینئرز سیلابی صورتحال سے نمٹنے کے لیے امدادی کارروائیوں میں مصروف ہیں ۔
پی ڈی ایم اے نے عوام سے اپیل کی ہے کہ وہ دریاؤں، نالوں اور نشیبی علاقوں سے دور رہیں اور غیر ضروری سفر سے گریز کریں، شہریوں کو ہدایت کی گئی ہے کہ وہ ٹی وی، ریڈیو، موبائل الرٹس اور پاک این ڈی ایم اے ڈیزاسٹر الرٹ ایپ کے ذریعے جاری کردہ ہدایات پر عمل کریں ۔
این ڈی ایم اے نے تمام متعلقہ اداروں کو ہائی الرٹ رہنے اور ایمرجنسی سروسز کو تیار رکھنے کی ہدایت کی ہے تاکہ کسی بھی ہنگامی صورتحال سے بروقت نمٹا جا سکے ۔
