اسلام آباد میں نیشنل کوآرڈینیٹر برائے سیاحت اور مشیرِ وزیراعظم پاکستان سردار یاسر الیاس خان کی زیرِ سرپرستی گرینڈ فیسٹیول 2026 بھرپور جوش و خروش کے ساتھ جاری ہے۔ یہ فیسٹیول نہ صرف تفریح کا رنگ لیے ہوئے ہے بلکہ پاکستان کے مثبت تشخص، سیاحتی امکانات اور ثقافتی تنوع کو اجاگر کرنے کی ایک جامع کوشش بھی ہے۔
پاکستان ٹورازم، اسپورٹس اینڈ فیملی فیسٹیول اسلام آباد کے ایف نائن پارک اور اسپورٹس کمپلیکس میں جاری ہے، جہاں رنگا رنگ سرگرمیوں نے شہریوں اور سیاحوں کی توجہ اپنی جانب مبذول کر رکھی ہے۔ فیسٹیول میں کھیل، ثقافت، موسیقی، علاقائی خوراک اور ایڈونچر اسپورٹس کو ایک پلیٹ فارم پر پیش کیا گیا ہے، جس سے ہر عمر کے افراد بھرپور لطف اندوز ہو رہے ہیں۔
اس موقع پر سردار یاسر الیاس خان کا کہنا تھا کہ اس فیسٹیول کا بنیادی مقصد پاکستان کی سیاحتی صلاحیتوں کو دنیا کے سامنے لانا، کھیلوں اور ایڈونچر سرگرمیوں کو فروغ دینا اور ملک کے مثبت تشخص کو اجاگر کرنا ہے۔ انہوں نے کہا کہ پاکستان قدرتی حسن، ثقافت اور مہمان نوازی سے مالا مال ملک ہے اور سیاحت کے شعبے میں بے پناہ امکانات موجود ہیں۔
سردار یاسر الیاس خان نے مزید کہا کہ فیسٹیول کے ذریعے عوام کو سیاحتی مقامات سے متعلق آگاہی فراہم کی جا رہی ہے اور اسلام آباد کو ایک اہم بین الاقوامی سیاحتی مرکز کے طور پر متعارف کرانے کی کوشش کی جا رہی ہے۔ انہوں نے بتایا کہ فیملیز کے لیے انٹری بالکل فری رکھی گئی ہے تاکہ ہر طبقہ اس فیسٹیول کو انجوائے کر سکے۔
فیسٹیول میں ٹینٹ پیگنگ، کار اور بائیک شو، ثقافتی مظاہرے، علاقائی کھیل، علاقائی خوراک کے اسٹالز، موسیقی اور تفریحی پروگرام شامل ہیں۔ اس کے علاوہ پیراگلائیڈنگ اور نیزہ بازی جیسے ایڈونچر اسپورٹس بھی فیسٹیول کا حصہ ہیں، جس میں ملک بھر سے 50 ٹیمیں نیزہ بازی کے مقابلوں میں شریک ہو رہی ہیں۔
سردار یاسر الیاس خان کا کہنا تھا کہ اس میگا ایونٹ کے ذریعے دنیا کو یہ پیغام دیا جا رہا ہے کہ پاکستان ایک پرامن اور محفوظ ملک ہے، جہاں سیاحت کے فروغ کے ذریعے معیشت کو مضبوط کیا جا سکتا ہے۔ انہوں نے امید ظاہر کی کہ ٹورازم کے شعبے سے پاکستان 40 ارب ڈالر تک آمدن حاصل کر سکتا ہے۔
انہوں نے کہا کہ پاکستان ایک مہمان نواز ملک ہے اور حکومت سیاحت کے فروغ کے لیے تمام دستیاب وسائل بروئے کار لائے گی تاکہ پاکستان عالمی سیاحتی نقشے پر ایک نمایاں مقام حاصل کر سکے۔
