خیبرپختونخوا کے مختلف علاقوں ،اسلام آباد، پنجاب اور ملک کے دیگر شہروں میں زلزلے کے شدید جھٹکے محسوس کیے گئے، ریکٹر سکیل پر زلزلے کی شدت 6 ریکارڈ کی گئی ۔
خیبر نیوز کے مطابق خیبرپختونخوا کے مختلف علاقوں پشاور، مردان، صوابی،تخت بھائی، ملاکنڈ، بونیر، چارسدہ، نوشہرہ، لوئر دیر، ہزارہ ڈویژن، تورغر، لنڈیکوتل، جمرود، کرک، مومنداپر اور لوئر، خیبر، ہنگو، لکی مروت اور دیگر علاقوں میں زلزلے کے شدید جھٹکے محسوس کئے گئے ۔
اسلام آباد، پنجاب میں راولپنڈی، ملکہ کوہسارمری اور گردونواح میں زلزلے کے جھٹکے محسوس کیے گئے جہاں لوگوں میں سخت خوف وہراس پھیل گیا اور شہری کلمہ طیبہ کا وردکرتے ہوئے گھروں سے باہر آگئے ۔
زلزلے کے شدید جھٹکوں سے لوگوں میں خوف وہراس پھیل گیا، لوگ کلمہ طیبہ کا ورد کرتے ہوئے باہر نکل آئے ۔
زلزلہ پیما مرکز کے مطابق ریکٹر اسکیل پر زلزلے کی شدت 6 ریکارڈ کی گئی، زلزلے کا مرکز افغانستان ممیں کوہ ہندوکش کا پہاڑی سلسلہ تھا ، گہرائی 15 کلومیٹر تھی ۔
ریسکیو1122 خیبرپختونخوا کے ترجمان بلال احمد فیضی نے بتایا کہ خیبرپختونخوا کے مختلف اضلاع میں زلزلے کے جھٹکے محسوس کیے گئے تاہم ریسکیو1122 کنٹرول رومز کو کسی بھی قسم کے نقصانات کی کال تاحال موصول نہیں ہوئی ۔
