راولپنڈی: بلوچستان کے ضلع قلات اور ضلع گوادر میں سکیورٹی فورسز کی دو مختلف کارروائیوں کے دوران 4 دہشت گرد ہلاک ہوگئے.
کارروائی کے دوران پاک فوج کے میجر وجاہت وحید نے جامِ شہادت نوش کیا۔
آئی ایس پی آر کے مطابق انٹیلی جنس اداروں نے ضلع قلات کے علاقے جتک آباد اور ضلع گوادر کی تحصیل پسنی کے علاقے شادی کور میں بھارتی سرپرستی میں سرگرم فتنہ الہندوستان کے متعدد ٹھکانوں کی موجودگی کی اطلاع دی تھی، جو مقامی آبادی کے لیے خطرہ بنے ہوئے تھے۔
مقامی آبادی کے تحفظ اور علاقے کو دہشت گردوں سے پاک کرنے کے لیے سکیورٹی فورسز کی جانب سے کارروائیاں جاری ہیں۔
آئی ایس پی آر کے مطابق 18 اکتوبر 2026 کو ضلع قلات کے علاقے جتک آباد میں انٹیلی جنس بنیادوں پر آپریشن کیا گیا۔
کارروائی کے دوران سکیورٹی فورسز نے دہشت گردوں کے ٹھکانے کو موٴثر انداز میں نشانہ بنایا۔
شدید فائرنگ کے تبادلے کے بعد 4 دہشت گرد ہلاک ہوگئے، جبکہ اسلحے اور گولہ بارود کی بڑی کھیپ بھی برآمد کرلی گئی۔
آئی ایس پی آر کے مطابق ضلع گوادر کی تحصیل پسنی کے علاقے شادی کور میں بھی دہشت گردوں کے خاتمے کے لیے متعدد کلیئرنس آپریشنز کیے گئے۔
اسی دوران میجر وجاہت وحید کی قیادت میں آگے بڑھنے والے سکیورٹی فورسز کے دستے کو دیسی ساختہ دھماکا خیز مواد (آئی ای ڈی) کے ذریعے نشانہ بنایا گیا۔
دھماکے کے نتیجے میں 34 سالہ میجر وجاہت وحید، ساکن لاہور، وطن کے دفاع میں فرض کی ادائیگی کے دوران شہید ہوگئے۔
آئی ایس پی آر کا کہنا ہے کہ علاقے میں موجود دیگر دہشت گردوں کے خاتمے کے لیے کلیئرنس اور سرچ آپریشنز جاری رہیں گے۔
آئی ایس پی آر کے مطابق وفاقی ایپکس کمیٹی کی جانب سے قومی ایکشن پلان کے تحت منظور کردہ وژن ”عزمِ استحکام“ کے تحت دہشت گردی کے خلاف مہم پوری رفتار سے جاری رہے گی۔
سکیورٹی فورسز اور قانون نافذ کرنے والے ادارے ملک سے بیرونی سرپرستی اور حمایت یافتہ دہشت گردی کے مکمل خاتمے کے لیے پْرعزم ہیں۔
