اسلام آباد: پاکستان نے خطے میں بڑھتی ہوئی کشیدگی پر گہری تشویش کا اظہار کیا ہے۔
ترجمان دفترِ خارجہ نے ہفتہ وار نیوز بریفنگ دیتے ہوئے کہا کہ پاکستان تمام فریقین کو تحمل، بردباری اور کشیدگی سے گریز کی تلقین کرتا ہے کیوں کہ تنازع کسی کے مفاد میں نہیں۔
پاکستان امن اور استحکام کے اپنے مؤقف پر قائم ہے اور اس کے نزدیک تمام تنازعات کا حل مذاکرات اور سفارت کاری میں مضمر ہے۔
ترجمان دفترِ خارجہ نے پہلگام حملے سے متعلق بھارتی الزامات کو مسترد کرتے ہوئے کہا کہ پاکستان کو اس واقعے سے جوڑنے کی بھارتی کوششیں صرف جھوٹے سیاسی مقاصد پر مبنی ہیں۔
پاکستان نے واقعے کی آزاد اور شفاف تحقیقات کا مطالبہ کیا تھا لیکن بھارت اپنے الزامات کے حق میں کوئی قابلِ اعتبار ثبوت پیش نہیں کر سکا۔
بھارت حقائق کے بجائے پروپیگنڈے اور الزام تراشی کا سہارا لے رہا ہے، غیرجانبدار تحقیقات سے گریز بھارتی مؤقف پر سوالات اٹھاتا ہے۔
انہوں نے آل پارٹیز حریت کانفرنس کی قیادت کے خلاف بھارتی چارج شیٹ کو بھی مسترد کرتے ہوئے اس کی مذمت کی اور کہا کہ بھارت حریت قیادت کو نشانہ بنانے کے لیے جعلی قانونی کارروائیوں کا سہارا لے رہا ہے۔
بھارتی عدالتی اور تحقیقاتی ادارے سیاسی مقاصد کے لیے استعمال کیے جا رہے ہیں۔
ترجمان نے کہا کہ ایسے اقدامات مقبوضہ جموں و کشمیر میں انسانی حقوق کی سنگین خلاف ورزیوں سے توجہ ہٹانے کی کوشش ہیں۔
