پشاور: خیبر پختونخوا میں بنیادی ڈھانچے کی بہتری کے لیے پشاور ناردرن بائی پاس منصوبے پر تعمیراتی کام تیزی سے جاری ہے۔
وفاقی حکومت کے اس اہم ترقیاتی منصوبے کے مختلف پیکجز پر نمایاں پیشرفت ہوئی ہے، جب کہ پیکیج ون کا تعمیراتی کام 100 فیصد مکمل کر لیا گیا ہے۔
پورے منصوبے کی تکمیل کے لیے 31 جنوری 2027 کی تاریخ مقرر کی گئی ہے۔
منصوبے کے دیگر حصوں میں بھی تعمیراتی کام مختلف مراحل میں جاری ہے۔
چارسدہ روڈ فلائی اوور کا 27 فیصد، پیکیج ٹو کا 81 فیصد، پیکیج تھری اے کا 93 فیصد جب کہ پیکیج تھری بی کا 79 فیصد کام مکمل ہو چکا ہے۔
چارسدہ روڈ فلائی اوور پر تعمیراتی سرگرمیاں جاری ہیں، جب کہ پیکیج ٹو کے تحت چارسدہ روڈ سے پشاور کینال ملزئی تک کام تیزی سے آگے بڑھ رہا ہے۔
پیکیج تھری بی میں ناصر باغ سے تختہ بیگ تک سڑک کی تعمیر کے ساتھ سات سپین والے پل کی تعمیر بھی جاری ہے۔
پل کے گرڈرز کی کاسٹنگ مکمل کر لی گئی ہے، جب کہ اسٹریسنگ کا کام جاری ہے۔
حکومتی ذرائع کے مطابق آئندہ ہفتے گرڈرز کی تنصیب کا عمل شروع کر دیا جائے گا۔
پشاور ناردرن بائی پاس منصوبے کی تکمیل کے لیے مختلف تعمیراتی مراحل پر کام جاری ہے۔
وفاقی اور خیبر پختونخوا کی نئی صوبائی حکومت کی جانب سے جاری ترقیاتی منصوبوں کو صوبے کے عوام کی جانب سے سراہا جا رہا ہے۔
