پی ڈی ایم اے خیبرپختونخوا کی جانب سے جاری بیان میں کہا گیا ہے کہ صوبے کے بیشتر اضلاع میں کل رات سے مون سون بارشوں کا ایک اور نیا سلسلہ شروع ہونے کا امکان۔
بیان کے مطابق کل شام /رات سے 16 اگست کے دوران طوفانی تیز بارش کی پیشگوئی کی گئی ہے ۔
پی ڈی ایم اے نے کہا ہے کہ کل شب سے بحیرہ عرب اور خلیج بنگال سے مزید مون سون ہوائیں صوبے کے بالائی اور وسطی علاقوں میں داخل ہوں گی ۔
بیان میں کہا گیا ہے کہ مون سون ہواوں کے باعث دیر، چترال، سوات، کوہستان، مالاکنڈ، باجوڑ، شانگلہ، بٹگرام، بونیر، کوہاٹ، باجوڑ، مہمند، خیبر، مانسہرہ، ایبٹ آباد، ہری پور، پشاور، مردان، چارسدہ، ہنگو، کرم، جنوبی و شمالی وزیرستان، بنوں اور ڈیرہ اسماعیل خان میں تیز ہواؤں اور گرج چمک کے ساتھ موسلادھار بارش کا امکان ہے۔
بارشوں کا یہ نیا سلسلہ 18 اگست تک وقفے وقفے سے جاری رہے گا ۔
بیان کے مطابق 14 سے 16 اگست کے دوران تیز بارشوں کے باعث صوبہ کے بالائی اضلاع می لینڈ سلائیڈنگ جبکہ وسطی/ میدانی علاقوں میں طغیانی/فلش فلڈ/اربن فلڈنگ کا بھی خطرہ۔
پی ڈی ایم اے کی جانب سے تمام ضلعی انتظامیہ کو موسمی صورتحال کے پیش نظر الرٹ جاری کردیا گیا ہے۔
پی ڈی ایم اے نے ضلعی انتظامیہ کو آندھی/جھکڑ چلنے اورگرج چمک کے باعث کسی بھی ناخوشگوار واقعے سے پیشگی نمٹنے کے لیے ہدایات جاری کر دیں۔
کسی بھی نا خوشگوار واقعے سے پیشگی نمٹنے کے لئے ضلعی انتظامیہ کو چھوٹی بڑی مشینری کی دستیابی یقینی بنانے کی بھی ہدایت جاری کردی گئی ہے ۔
دوسری جانب محکمہ موسمیات نے کہا ہے کہ آئندہ 24 گھنٹوں کے دوران کشمیر،شمال مشرقی پنجاب، خطہ پوٹھوہار ، اسلام آباد میں تیز ہواؤں/جھکڑ چلنے اور گرج چمک کے ساتھ بارش جبکہ بعض مقامات پر موسلادھار بارش کا امکان ہے۔
محکمہ موسمیات کے مطابق اس دوران جنوبی پنجاب، شمال مشرقی/جنوبی بلوچستان اور جنوب مشرقی /بالائی سندھ میں چند مقا مات پر تیز ہواؤں اور گرج چمک کے ساتھ بارش کی توقع جبکہ سندھ کے ساحلی علاقوں میں چند مقامات پر ہلکی بارش کا امکان ہے۔
