پشاور گیریژن میں شہداءِ پاکستان کو خراجِ عقیدت پیش کرنے کے لیے خصوصی تقریب کا انعقاد

خیبر پختونخوا میں جامِ شہادت نوش کرنے والے پاک فوج کے بہادر سپوتوں کی عظیم قربانیوں کو خراجِ عقیدت پیش کرنے کیلئے پشاور گیریژن میں ایک پروقار تقریب منعقد کی گئی۔ تقریب میں شہداء کے لواحقین نے شرکت کی۔
تقریب میں کور کمانڈر پشاور نے بطور مہمانِ خصوصی شرکت کی۔ پشاور آمد پر انہوں نے یادگارِ شہداء پر حاضری دی اور شہداء کے درجات کی بلندی کے لیے خصوصی دعا کی۔ اس موقع پر انہوں نے شہداء کے لواحقین سے فرداً فرداً ملاقات کی اور ان کے بلند حوصلے کو سراہا۔ کور کمانڈر نے شہداء کی پاکستان کے لیے دی جانے والی عظیم قربانیوں کو بھی خراجِ تحسین پیش کیا۔
تقریب کے دوران شہداء کے کارناموں اور ملک و ملت کے لیے دی جانے والی قربانیوں پر مبنی خصوصی ویڈیوز بھی دکھائی گئیں۔ ان دستاویزی فلموں میں شہداء کی پیشہ ورانہ مہارت اور وطن سے محبت کے بے مثال جذبے کو اجاگر کیا گیا۔ تقریب کے اختتام پر کور کمانڈر نے شہداء کو بھرپور خراجِ تحسین پیش کیا اور تقریب میں شرکت کرنے والے لواحقین کا شکریہ ادا کیا۔