پاک فوج کے شعبہ اطلاعات آئی ایس پی آر کی جانب سے جاری بیان کے مطابق قانون نافذ کرنے والے اداروں نے 4 اور 5 اکتوبر کی درمیانی شب سوات کے علاقے چار باغ میں انٹیلجنس بیسڈ آپریشن کیا۔
آپریشن کے دوران فائرنگ کے شدید تبادلے میں دہشتگردوں کے سرغنہ عطا اللہ مہران سمیت دو دہشتگرد ہلاک ہوگئے جبکہ ایک شدت پسند کو زخمی حالت میں گرفتار کرلیا گیا۔
آئی ایس پی آر کے مطابق ہلاک دہشتگرد عطا اللہ مہران 22 ستمبر2024 کو غیرملکی سفیروں کے قافلے میں موجود پولیس وین پردھماکہ خیز مواد سے حملے سمیت علاقے میں دہشت گردی کی متعدد کارروائیوں میں ملوث تھا۔
آئی ایس پی آر نے مزید کہا کہ سیکورٹی فورسز قانون نافذ کرنے والے اداروں کے تعاون سے ملک سے دہشت گردی کے ناسور کو جڑ سے ختم کرنے کے لیے پرعزم ہیں۔
