اسلام آباد: ابوظہبی کے ولی عہد شیخ خالد بن محمد زائد النہیان سرکاری دورے پر اسلام آباد پہنچ گئے، معزز مہمان اپنے وفد کے ہمراہ نور خان ایئر بیس پہنچے ۔
صدرِ مملکت آصف علی زرداری اور وزیرِاعظم شہباز شریف سمیت دیگر اعلیٰ حکام نے نے نور خان ایئر بیس پر ابوظہبی کے ولی عہد کا استقبال کیا۔
پاکستان دورے کے دوران ابوظہبی کے ولی عہد کو نشان پاکستان سے نوازا جائے گا، شیخ خالد بن محمد کو نشان پاکستان سے نوازنے کیلئے خصوصی تقریب کا انعقاد بھی کیا جائے گا ۔
سفارتی ذرائع کا کہنا ہے کہ ایک روزہ دورے میں ابوظہبی کے ولی عہد شہزادہ شیخ خالد بن محمد بن زید النہیان وزیر اعظم شہباز شریف سمیت دیگر اعلیٰ حکام سے اہم ملاقاتیں کریں گے، ابوظہبی کے ولی عہد کا وزیراعظم کے ہمراہ مفاہمتی یادداشت پر دستخط کا بھی امکان ہے ۔
ابوظہبی کے ولی عہد شیخ خالد ابوظہبی کی سپریم کونسل برائے مالیاتی و اقتصادی امور کے رکن ہیں، وہ ابوظہبی نیشنل آئل کمپنی ADNOC کے بورڈ ممبر بھی ہیں ۔
شہزادہ شیخ خالد بن محمد بن زید النہیان ابو ظہبی انویسٹمنٹ اتھارٹی کے بورڈ آف ڈائریکٹرز کے بھی رکن ہیں، وہ بطور سربراہ نیشنل سکیورٹی اور ڈپٹی نیشنل سکیورٹی ایڈوائزر کے طور پر بھی ذمہ داریاں ادا کر چکے ہیں ۔
سفارتی ذرائع کے مطابق ابوظہبی کے ولی عہد اپنے دورے میں پاکستان میں کاروبار، تجارت اور سرمایہ کاری لانے کے تناظر میں شیخ خالد بن محمد کا دورہ اہمیت کا حامل ہے ۔
