حکومت ما لیاتی نظم و ضبط کو برقرار رکھتے ہوئے میکرو اکنامک استحکام کو مزید مضبوط بنائے گی، وفاقی وزیر خزانہ محمد اورنگزیب

وفاقی وزیر خزانہ سینیٹر محمد اورنگزیب کے ساتھ بین الاقوامی مالیاتی فنڈ کے وفد نے اسلام اباد میں ملاقات کی۔ ملاقات کے دوران وزیرِ خزانہ نے کہا کہ گزشتہ جائزے کی کامیاب تکمیل کے بعد پاکستان نے معاشی استحکام کے حصول میں نمایاں پیش رفت کو برقرار رکھا ہے۔
انہوں نے اس عزم کا اعادہ کیا کہ حکومت ما لیاتی نظم و ضبط کو برقرار رکھتے ہوئے میکرو اکنامک استحکام کو مزید مضبوط بنائے گی۔ ان کا کہنا تھا کہ یہ کامیابیاں مشکل مگر ضروری اصلاحات کا نتیجہ ہیں۔
وزیرِ خزانہ نے ٹیکس نظام اور توانائی کے شعبے میں جاری اصلاحات کو حکومت کی ترجیحات قرار دیا۔ انہوں نے بتایا کہ ٹیکس نظام میں اصلاحات کے لیے افراد، طریقہ کار اور ٹیکنالوجی کے شعبوں میں جامع اقدامات کیے جا رہے ہیں، جبکہ ٹیکس پالیسی آفس کو مکمل طور پر فعال بنانے کے لیے بھی پیش رفت جاری ہے تاکہ آئندہ ٹیکس پالیسیاں معاشی اصولوں کے مطابق اور پائیدار ترقی کے تقاضوں سے ہم آہنگ ہوں۔
انہوں نے نجکاری اور سرکاری اداروں کی اصلاحات کے حوالے سے حکومت کے عزم کا اعادہ کرتے ہوئے کہا کہ تنظیمِ نو کے اقدامات شفاف انداز میں آگے بڑھائے جائیں گے۔ وفاقی وزیر خزانہ نے کہا کہ حالیہ معاشی اشاریے سرمایہ کاروں کے بڑھتے ہوئے اعتماد کی عکاسی کرتے ہیں۔