وزیر اعلیٰ خیبر پختونخوا سہیل آفریدی نے صوبے کے تعلیمی اداروں میں اخلاقیات کو بطور مضمون نصاب میں شامل کرنے کا اعلان کرتے ہوئے کہا ہے کہ تعلیم کے ساتھ تربیت ناگزیر ہے، یہ انسان کو باکردار، ذمہ دار اور کامیاب بناتی ہے ۔
پشاور: وزیر اعلیٰ خیبر پختونخوا سہیل آفریدی نے گورنمنٹ شہید مبین شاہ آفریدی ہائر سکینڈری سکول پشاورکا اچانک دورہ کیا، اس موقع پر وزیراعلیٰ نے سکول میں تعلیمی ماحول کا جائزہ لیا اور انتظامی و تدریسی عملے سے بھی گفتگو کی ۔
وزیراعلیٰ سہیل آفریدی نے متعلقہ حکام کو تمام سرکاری سکولوں میں سی سی ٹی وی کیمرے نصب کرنے، ناپید سہولتیں ترجیحی بنیادوں پر فراہم کرنے اور نئے تعلیمی سیشن کے آغاز پر تمام طلبہ کو مفت درسی کتابوں کی فراہمی یقینی بنانےکی ہدایت کی ۔
انہوں نے کہا کہ سکول انتظامیہ اور تدریسی عملہ معیاری تعلیم پر توجہ دے، سرکاری سکولوں میں موجود خامیوں کو دور کیا جائےگا ۔
وزیراعلیٰ سہیل آفریدی کا کہنا تھا کہ اساتذہ اور ڈاکٹرز معاشرے کے اہم ستون ہیں،ا ساتذہ کے ہاتھ میں بچوں کا مستقبل اور ڈاکٹرز کے ہاتھ میں عوام کی صحت ہے ۔
وزیر اعلی نے طلبہ کو محنت، یکسوئی اور واضح مقصد کے ساتھ آگے بڑھنے کی تلقین کرتے ہوئے کہا کہ آپ جس فیلڈ میں بھی جائیں اس میں کمال حاصل کریں ۔
