اسلام آباد: پاکستان پیپلزپارٹی کے چیئرمین بلاول بھٹو زرداری چند گھنٹوں میں دوبارہ ملاقات کیلئے سربراہ جے یو آئی کی رہائش گاہ پر پہنچے جہاں انہوں نے مولانا فضل الرحمان کے ساتھ اہم ملاقات کی ۔
بلاول بھٹو اپنے وفد کے ہمراہ مولانا فضل الرحمان کی رہائش گاہ پر پہنچے۔ جہاں جے یو آئی سربراہ نےان کا پرتپاک انداز میں استقبال کیا۔
ترجمان جے یو آئی کے مطابق پی پی کے وفد میں خورشید شاہ، نوید قمر، میئر کراچی مرتضیٰ وہاب شامل تھے جبکہ ملاقات میں جے یو آئی کے سیکرٹری جنرل مولانا غفور حیدری، مولانا عبدالواسع، مولانا اسعد محمود، سینیٹر کامران مرتضیٰ اور دیگر رہنما شریک تھے۔
ملاقات کے بعد میڈیا سے گفتگو کرتے ہوئے خورشید شاہ نے کہا کہ آج پہلی مرتبہ یہاں نہیں آئے، آئندہ بھی یہ رابطے اور ملاقات جاری رہیں گی، ملاقات میں مولانا کو آئینی ترمیم کے حوالے سے آگاہ کیا گیا اور انہیں راضی کرنے کی کوشش بھی کی گئی۔
انہوں نے کہا کہ ملاقات کا مقصد مولانا کی تجاویز سننے کیلئے یہاں آنا تھا، ہماری کوشش ہے پاکستان کے عوام کی امنگوں کے مطابق پارلیمنٹ کی بالادستی ہو،ہم چاہتے ہیں آئیں و قانون کے مطابق پارلیمنٹ میں بل پیش ہوں،مولانا کو آئینی بل کے حوالے سے اعتماد میں لینے آئے تھے، تاکہ اتفاق رائے سے بل پاس کروایا جا سکے۔
اس سے قبل وزیراعظم سے بلاول ہاؤس کی اہم ملاقات ہوئی جس میں پی پی چیئرمین نے مولانا فضل الرحمان سے ہونے والی ملاقات کے حوالے سے وزیراعظم کو آگاہ کیا۔ اس سے پہلے بلاول بھٹو آئینی ترمیم کے معاملے پر مشاورت اور حمایت کیلیے مولانا فضل الرحمان کی رہائش گاہ پہنچے تھے۔
