آرمی چیف جنرل سید عاصم منیر نے واضح کیا ہے کہ پاکستان خطے میں امن کا خواہاں ہے، پاکستان کی خودمختاری اور سالمیت کو چیلنج کیا گیا تو بھرپور جواب دیا جائے گا ۔
راولپنڈی: آئی ایس پی آر کی جانب سے جاری بیان میں کہا گیا ہے کہ جنرل ہیڈ کوارٹر میں بلوچستان سے متعلق نیشنل سکیورٹی ورکشاپ کے شرکاء سے خطاب کرتے ہوئے آرمی چیف جنرل سیدعاصم منیر نےکہا کہ بلوچستان کی سماجی اقتصادی صورتحال کو بہتر بنانے پر حکومت کی مسلسل توجہ ہے، کئی ترقیاتی منصوبوں کے ثمرات بلوچستان کے عوام تک پہنچنا شروع ہو چکے ہیں ۔
آرمی چیف کا کہنا تھا کہ بلوچستان کے لوگوں خصوصاً نوجوانوں میں شعور بیدار کرنے میں سول سوسائٹی کے ارکان کا کردار قابل تعریف ہے، اب نوجوانوں نے ترقی کو خوشحالی کی طرف لے جانے میں اپنا کردار ادا کرنا ہے ۔
سربراہ پاک فوج نے اس بات پر زور دیا کہ غیر ملکی سپانسرڈ دہشت گردی بلوچستان کی سلامتی اور ترقی کے لیے سب سے بڑا خطرہ ہے، جو تشدد کو ہوا دینے، خوف و ہراس پھیلانے اور صوبے کو غیر مستحکم کرنےکے درپے ہیں، ان دشمن عناصر کے مذموم عزائم کو کامیاب نہیں ہونے دیا جائےگا ۔
آرمی چیف جنرل سید عاصم منیر کا مزید کہنا تھا کہ دہشت گردوں کا کوئی مذہب، فرقے یا انسانیت سے کوئی تعلق نہیں اور اس کا مقابلہ غیر متزلزل قومی اتحاد کے ساتھ کرنا چاہیے، جو دہشت گرد گروہ بلوچ شناخت کے نام پر دہشت گردی کا ارتکاب کرتے ہیں تاکہ اپنے سازشی ایجنڈے کو آگے بڑھا سکیں، وہ عناصر بلوچ غیرت اور حب الوطنی پر دھبہ ہیں ۔
آرمی چیف جنرل سید عاصم منیر نے اس بات پر زور دیا کہ پاکستان خطے میں امن کا خواہاں ہے، تاہم اگر پاکستان کی خودمختاری اور علاقائی سالمیت کی خلاف ورزی کی گئی تو پاکستان اپنے قومی وقار اور اپنے عوام کی فلاح و بہبود کے لیے پوری قوت سے جواب دے گا ۔
آرمی چیف جنرل عاصم منیر نے یہ بھی کہا کہ پاکستان کی مسلح افواج اور قانون نافذ کرنے والے ادارے پاکستانی عوام کی مکمل حمایت سے دہشت گردی کے خلاف جنگ جاری رکھیں گے ۔
