استور: گلگت بلتستان حکومت کے ترجمان فیض اللہ فراق کے مطابق بدقسمت گاڑی استور سے چکوال جا رہی تھی کہ تھلیچی پل کے قریب دریا میں جاگری۔
ترجمان نے اپنے بیان میں کہا ہے کہ بس میں 23 سے زائد مسافر سوار تھے۔ بس میں سوار افراد دلہن کو چھوڑنےکے لیے استور سے چکوال جا رہے تھے۔
فیض اللہ فراق نے مزید کہا کہ دریا سے 18 افراد کی لاشیں اور ایک زخمی کو نکالا گیا ہے جب کہ بقیہ افراد کی تلاش جاری ہے۔
ترجمان کے مطابق وزیراعلیٰ گلگت بلتستان نے حادثے پر اظہار افسوس کرتے ہوئے ریسکیو آپریشن تیز کرنےکی ہدایت کی ہے۔
دوسری جانب پولیس کا کہنا ہے کہ کوسٹر میں 25 افراد سوار تھے، دلہن کو زخمی حالت میں بچالیا گیا ہے۔
دوسری جانب دیامر کے پولیس حکام نے کہا ہے کہ لاپتہ افراد کی تلاش کے لیے ریسکیو آپریشن جاری ہے۔
