بلوچستان کے ضلع قلعہ عبداللہ میں فائرنگ کے دو الگ الگ واقعات میں مجموعی طور پر آٹھ افراد جاں بحق جبکہ دو زخمی ہو گئے۔
پولیس کے مطابق میزئی اڈہ کے نادرا مارکیٹ میں موٹر سائیکل سوار مسلح افراد کی فائرنگ کے نتیجے میں پانچ افراد جان کی بازی ہار گئے۔ جاں بحق ہونے والوں میں معروف قبائلی رہنما داد محمد کاکڑ بھی شامل ہیں۔ واقعے کے بعد مقتولین کے لواحقین اور شہریوں نے احتجاجی مظاہرہ کیا اور کچھ وقت کے لیے کوئٹہ-چمن شاہراہ کو ٹریفک کے لیے بند کر دیا۔
مظاہرین نے ملزمان کی فوری گرفتاری اور علاقے میں امن و امان کی صورتحال بہتر بنانے کا مطالبہ کیا۔ پولیس کا کہنا ہے کہ واقعے کی تحقیقات شروع کر دی گئی ہیں اور حملہ آوروں کی تلاش جاری ہے۔
دوسری جانب قلعہ عبداللہ کے علاقے دولنگی میں دو قبائل کے درمیان جاری خونریز تصادم میں تین افراد جاں بحق ہو گئے۔ مقامی ذرائع کے مطابق فریقین کے درمیان کشیدگی برقرار ہے جبکہ علاقے کے عمائدین، سفید ریش بزرگوں اور علمائے کرام نے دونوں قبائل سے تحمل کا مظاہرہ کرنے اور تنازعے کے پرامن حل کی اپیل کی ہے۔
