اسلام آباد: افغانستان کے لیے چین کے خصوصی نمائندے یو شیاو یونگ نے اسلام آباد میں پاکستان کے خصوصی نمائندے برائے افغانستان محمد صادق خان سے ملاقات کی ، جس میں دوطرفہ تعلقات، علاقائی صورتحال اور سلامتی کے امور پر تفصیلی تبادلۂ خیال کیا گیا ۔
محمد صادق خان کے مطابق وفود کی سطح پر ہونے والی ملاقات میں خطے کو درپیش دہشت گردی کے چیلنجز سے نمٹنے کے لیے مشترکہ حکمت عملی اختیار کرنے پر غور کیا گیا ۔ ملاقات کے دوران افغانستان میں موجود تحریک طالبان پاکستان (ٹی ٹی پی) اور ایسٹ ترکستان اسلامک موومنٹ (ای ٹی آئی ایم) سے پاکستان اور چین کو درپیش سیکیورٹی خطرات پر بھی بات چیت ہوئی ۔
پاکستانی خصوصی نمائندے کا کہنا تھا کہ دونوں ممالک نے دہشت گردی کی روک تھام اور علاقائی امن و استحکام کے فروغ کے لیے باہمی تعاون اور مشترکہ کوششوں کو مزید مضبوط بنانے پر اتفاق کیا ۔
واضح رہے کہ چین اپنے تجارتی اور اقتصادی مفادات کے پیش نظر پاکستان اور افغانستان میں امن و استحکام کا خواہاں ہے ۔ اسی مقصد کے تحت چین ماضی میں پاکستان اور افغان طالبان کے درمیان اعتماد سازی اور مذاکرات کے فروغ میں بھی کردار ادا کرتا رہا ہے ۔
