کوئٹہ: بلوچستان کے علاقے مستونگ میں نامعلوم افراد نے گاڑی پر فائرنگ کی جس کے نتیجے میں ڈپٹی کمشنر پنجگور جاں بحق جبکہ واقعے میں چیئرمین میونسپل کمیٹی سمیت دو افراد زخمی ہوگئے۔
لیویز حکام نے واقعے کی تصدیق کرتے ہوئے بتایا کہ نامعلوم مسلح افراد نے مستونگ کے علاقے کھڈکوچہ میں ڈپٹی کمشنر پنجگور کی گاڑی پر فائرنگ کی۔
فائرنگ کے نتیجے میں ڈپٹی کمشنر پنجگور ذاکر بلوچ موقع پر جاں بحق ہوگئے جبکہ چئیرمین میونسپل کمیٹی سمیت دو افراد زخمی ہوئے جنہیں طبی امداد کے لیے ہسپتال منتقل کردیا گیا۔
وزیر اعلیٰ بلوچستان نے مستونگ میں فائرنگ کے واقعہ میں ڈی سی پنجگور کے جاں بحق ہونے پر اظہار افسوس کرتے ہوئے دہشت گردوں کی گرفتاری کیلیے فوری کارروائی کی ہدایت کردی۔
وفاقی وزیرداخلہ محسن نقوی نے مستونگ کے علاقے میں ڈپٹی کمشنر پنجگور کی گاڑی پر فائرنگ کے واقعہ کی شدید الفاظ میں مذمت کرتے ہوئے اُن کے جاں بحق ہونے پر افسوس اور گہرے دکھ کا اظہار کرتے ہوئے لواحقین سے تعزیت کی۔
وزیرِ اعظم محمد شہباز شریف نے ڈپٹی کمشنر مستونگ کی گاڑی پر حملے اور جاں بحق ہونے کی شدید الفاظ میں مذمت کرنے ہوئے ذاکر بلوچ کی شہادت پر گہرے دکھ اور رنج کا اظہار کیا ہے۔
وزیرِ اعظم نے شہید کے درجات کی بلندی اور اہلِ خانہ کیلئے صبر جمیل کی دعا کی جبکہ متعلقہ حکام کو زخمیوں کی بہتر طبی امداد کی ہدایت بھی کی۔
