مالی سال 24-2023 کے دوران پاکستان کی اشیا کی برآمدات میں 10.54 فیصد اضافہ ہوا جس کے بعد ملکی برآمدات 30 ارب 64 کروڑ ڈالر تک پہنچ گئیں۔
رپورٹ کے مطابق گزشتہ سال ملکی برآمدات کا حجم 27 ارب 72 کروڑ ڈالر رہاتھا۔جولائی 2023 میں برآمدات میں بتدریج اضافہ شروع ہوا، جبکہ جنوری سے اپریل تک منفی رہا، تاہم مئی میں اضافے کا رجحان دوبارہ شروع ہوا جو جون تک جاری رہا۔
ملکی تاریخ میں برآمدات کی بْلند ترین سطح31 ارب 78 کروڑ ڈالر مالی سال 22-2021 کے دوران ریکارڈ کی گئی تھی، تاہم اس کے بعد برآمدات گر کر 27 ارب 54 کروڑ ڈالر رہ گئی تھیں۔
رواں سال جون میں برآمدات کی حجم میں 7.34 فیصد اضافہ ہواتھا جس کے بعد برآمدات 2 ارب 53 کروڑ ڈالر تک جا پہنچیں، جو گزشتہ سال کے جون میں 2 ارب 35 کروڑ ڈالر ریکارڈ کی گئی تھیں۔
ایکسپورٹرز ایسوسی ایشن نے حکومت کو خبردار کرتے ہوئے کہا ہے کہ بجٹ 25-2024 میں لاگو کردہ ٹیکس اقدامات کے منفی نتائج برآمد ہوں گے، جس سے برآمدات میں کمی واقع ہوگی۔
مالی سال 2025 کیلئے درآمدات کا ہدف 57 ارب 30 کروڑ ڈالر رکھا گیا ہے، جون میں تجارتی خسارہ 30.39 فیصد بڑھ کر 2 ارب 39 کروڑ ڈالر ہو گیا، جو گزشتہ برس کے جون میں ایک ارب 83 کروڑ ڈالر رہا تھا، جبکہ مالی سال 2024 میں تجارتی خسارہ کم ہو کر 24 ارب 8 کروڑ ڈالر رہ گیا، جس کا حجم گزشتہ سال 27 ارب 47 کروڑ ڈالر رہا تھا۔
