انگلینڈ کی کرکٹ ٹیم کی 3 ٹیسٹ میچز پر مشتمل سیریز کھیلنے کیلئے پاکستان پہنچ گئی۔
انگلش ٹیم کپتان بین سٹوکس کی قیادت میں ملتان ائیرپورٹ پہنچی، جہاں دو روز آرام کے بعد 4 اکتوبر سے پریکٹس شروع کرے گی۔
پاکستان اور انگلینڈ کے درمیان پہلا ٹیسٹ میچ 7 اکتوبر سے ملتان کرکٹ سٹیڈیم میں کھیلا جائے گا۔
دونوں ٹیموں کے درمیان دوسرا ٹیسٹ بھی ملتان میں 15 اکتوبر سے شروع ہوگا جبکہ تیسرا اور آخری ٹیسٹ میچ 24 اکتوبر سے راولپنڈی میں کھیلا جائے گا۔
دوسری جانب حکومتی ذرائع نے بتایا ہے کہ انگلینڈ کرکٹ ٹیم کو پاکستان کے دورے کے دوران صدر مملکت کے برابر سکیورٹی اور پروٹوکول دیا جائے گا، ملتان اور راولپنڈی میں تینوں ٹیسٹ میچوں کے دوران انگلینڈ کرکٹ ٹیم اور آفیشلز کو فول پروف سکیورٹی ملے گی۔
ذرائع نے مزید بتایا ہے کہ وزیراعظم شہبازشریف کے حکم پر کابینہ ڈویژن نے وزارت داخلہ کو تمام ضروری اقدامات اٹھانے اور وی وی آئی پی سکیورٹی و پروٹوکول پر عمل درآمد کو یقینی بنانے کی ہدایات جاری کردی ہیں۔
