گزشتہ روز نیوزی لینڈ کے خلاف میچ میں انجری کے باعث قومی ٹیم کے مایاناز اوپنر فخر زمان چیمپئنز ٹرافی سے باہر ہوگئے، فخر زمان کی جگہ قومی سکواڈ میں امام الحق کو شامل کرلیا گیا ۔
فخر زمان کے انجرڈ ہونے کے بعد آئی سی سی ایونٹ ٹیکنیکل کمیٹی نے قومی سکواڈ میں امام الحق کی شمولیت کی باقاعدہ منظوری بھی دیدی ۔
ایونٹ ٹیکنیکل کمیٹی میں وسیم خان،عثمان واہلہ،سارا ایڈگر اور شان پولگ شامل ہیں ۔
فخر زمان کے ایونٹ سے باہر ہونے کے بعد قومی پاکستان کرکٹ بورڈ کی جانب سے متبادل کھلاڑی کے نام پر غور کیا جا رہا تھا تاہم اب امام الحق کو فخر زمان کی جگہ اسکواڈ میں شامل کرلیا گیا ہے ۔
پاکستان کرکٹ بورڈ کی جانب سے فخر زمان کے انجری کے باعث چیمپئنز ٹرافی سے آؤٹ ہونے کی تصدیق کر دی گئی تھی بعد ازاں پی سی بی نے فخر زمان کے متبادل کھلاڑی کے لیے آئی سی سی سے رابطہ کیا تھا ۔
واضح رہے کہ فخر زمان نیوزی لینڈ کے خلاف میچ میں فیلڈنگ کے دوران انجری کا شکار ہو گئے تھے جس کے باعث ان کی جگہ اوپن کرنے بھی سعود شکیل آئے تھے اور فخر زمان کو بیٹنگ کے لیے چوتھے نمبر پر بھیجا گیا تھا ۔
