ژوب (بلوچستان) — فیلڈ مارشل عاصم منیر نے عیدالاضحیٰ کے موقع پر بلوچستان کے ضلع ژوب میں مغربی سرحدوں پر اگلے مورچوں کا دورہ کیا اور جوانوں کے ساتھ عید منائی۔
آئی ایس پی آر کے مطابق فیلڈ مارشل نے جوانوں کے ساتھ نمازِ عید ادا کی، جس کے بعد ملک میں امن، استحکام اور خوشحالی کے لیے خصوصی دعائیں کی گئیں۔ اس موقع پر وطن کے دفاع میں جانوں کا نذرانہ پیش کرنے والے شہداء کے لیے بھی دعا کی گئی۔
فیلڈ مارشل نے افسران اور جوانوں کو عید کی مبارکباد دیتے ہوئے ان کے بلند حوصلے، مضبوط عزم، آپریشنل تیاری اور غیر ملکی حمایت یافتہ دہشت گردی کے خلاف مسلسل چوکسی کو سراہا۔
انہوں نے ملک کو دہشت گردی کے خطرات اور دشمن عناصر کی سازشوں سے محفوظ رکھنے میں پاک فوج کے عزم اور قربانیوں کو خراجِ تحسین پیش کیا۔
فیلڈ مارشل عاصم منیر نے کوئٹہ میں حالیہ دہشت گرد حملے کی شدید مذمت کرتے ہوئے کہا کہ یہ حملہ بھارتی حمایت یافتہ نیٹ ورکس کی کارروائی ہے۔
انہوں نے واضح کیا کہ ایسے بزدلانہ اور غیر انسانی اقدامات نہ تو پاک فوج کے عزم کو کمزور کر سکتے ہیں اور نہ ہی پاکستانی قوم کے حوصلے کو۔ انہوں نے کہا کہ دہشت گردی کے تمام سہولت کاروں کے خلاف بھرپور کارروائیاں جاری رہیں گی۔
