اسلام آباد: نائب وزیراعظم و وزیر خارجہ سینیٹر محمد اسحاق ڈار سرکاری دورے پر نیویارک پہنچ گئے ہیں۔
نائب وزیراعظم وہاں اقوام متحدہ کی سلامتی کونسل کے اہم اعلیٰ سطحی اجلاس میں شرکت کریں گے۔
ترجمان دفتر خارجہ کے مطابق اسحاق ڈار اقوام متحدہ کی سلامتی کونسل کے اوپن ڈیبیٹ میں شرکت کریں گے۔
اس ڈیبیٹ کا موضوع "بین الاقوامی امن و سلامتی کا تحفظ، اقوام متحدہ کے منشور کے مقاصد اور اصولوں کی پاسداری، اور اقوام متحدہ کے مرکزی عالمی نظام کو مضبوط بنانا” ہے۔
یہ اجلاس سلامتی کونسل کی چینی صدارت کے تحت منعقد کیا جا رہا ہے۔
دورے کے دوران نائب وزیراعظم و وزیر خارجہ مختلف ممالک کے وزرائے خارجہ سے دوطرفہ ملاقاتیں بھی کریں گے۔
نیویارک پہنچنے پر پاکستان کے مستقل مندوب برائے اقوام متحدہ سفیر عاصم افتخار احمد اور نیویارک میں پاکستان کے قونصل جنرل عامر احمد اَتوزئی نے ان کا استقبال کیا۔
دفتر خارجہ کے مطابق یہ دورہ عالمی سطح پر امن و سلامتی کے امور پر پاکستان کے مؤقف کو مؤثر انداز میں اجاگر کرنے کے لیے اہم قرار دیا جا رہا ہے۔
