کراچی: پاک فضائیہ نے عیدالاضحیٰ کے موقع پر قربانی کے جانوروں کی آلائشوں کی غیر مناسب تلفی سے پیدا ہونے والے فضائی خطرات سے متعلق ایک آگاہی ویڈیو جاری کی ہے۔
ویڈیو میں عوام کو پیغام دیا گیا ہے کہ کھلے مقامات پر آلائشیں اور کچرا پھینکنے سے پرندے، خصوصاً چیلیں اور کوے، بڑی تعداد میں جمع ہو جاتے ہیں، جو ایئر بیسز کے قریب فضائی آپریشنز کے لیے شدید خطرہ بن سکتے ہیں۔
پاک فضائیہ کے مطابق پرندوں کا طیاروں سے ٹکراؤ (برڈ ہٹ) لینڈنگ اور ٹیک آف کے دوران انجن اور دیگر اہم پرزہ جات کو نقصان پہنچا سکتا ہے، جس سے قیمتی جانوں اور طیاروں کو خطرہ لاحق ہو سکتا ہے۔
ترجمان پاک فضائیہ نے عوام سے اپیل کی ہے کہ قربانی کے جانوروں کی آلائشوں کو کچرے کے تھیلوں میں ڈال کر حکومتی ہدایات کے مطابق مخصوص مقامات پر تلف کیا جائے یا انہیں زمین میں گہرا گڑھا کھود کر دفن کیا جائے تاکہ کسی بھی ناخوشگوار صورتحال سے بچا جا سکے۔
