بنوں کے علاقے شابری بھرت میں فائرنگ کے ایک افسوسناک واقعے میں خاتون اور اس کے دو بچوں سمیت پانچ افراد جاں بحق جبکہ ایک بچی سمیت دو افراد زخمی ہوگئے۔
پولیس کے مطابق یہ افسوسناک واقعہ تھانہ ککی کی حدود شابری بھرت میں اس وقت پیش آیا جب دو فریقین کے درمیان کسی معاملے پر تنازع کھڑا ہوگیا۔ پولیس کا کہنا ہے کہ ایک فریق دوسرے فریق کا تعاقب کرتے ہوئے ان کے گھر میں داخل ہوگیا اور اندھا دھند فائرنگ کردی۔
فائرنگ کے نتیجے میں گھر میں موجود خاتون، اس کے دو بچوں سمیت پانچ افراد موقع پر ہی جاں بحق ہوگئے، جبکہ ایک کمسن بچی سمیت دو افراد زخمی ہوگئے۔
واقعے کی اطلاع ملتے ہی پولیس فوری طور پر جائے وقوعہ پر پہنچ گئی، علاقے کو گھیرے میں لے لیا اور جاں بحق و زخمی افراد کو اسپتال منتقل کردیا۔
پولیس نے نامعلوم ملزمان کے خلاف مقدمہ درج کرکے واقعے کی تحقیقات شروع کردی ہیں، جبکہ ملزمان کی گرفتاری کے لیے کارروائی جاری ہے۔
