پشاور: رمضان المبارک میں لوڈ شیڈنگ ، گورنر خیبرپختونخوا نے وزیر اعظم پاکستان کو خط لکھ دیا ، خط کے متن کے مطابق خیبرپختونخوا وافر مقدار میں بجلی اور قدرتی گیس پیدا کرنے والا صوبہ ہے ۔
گورنر نے کہا ہے کہ ہمارے وسائل سے پیدا بجلی اور گیس سے ہمارا صوبہ محروم رکھا جارہا ہے ،رمضان المبارک میں بجلی اور گیس کی لوڈ شیڈنگ نے صوبہ بھر کے عوام کی زندگی اجیرن بنادی ہے ۔
خط کے متن ے مطابق بطور وزیر اعظم آپکی جانب سے بجلی اور گیس کی عدم لوڈ شیڈنگ کے اعلان پر عمل نہیں کیا جارہا ،سحری ، افطاری اور عبادات کے اوقات میں بجلی ، گیس کی لوڈ شیڈنگ سے شہری اذیت سے دوچار ہیں ۔
گورنر نے اپنے خط میں مزید کہا ہے کہ ماہ رمضان کا تقدس اس بات کا تقاضا کرتا ہے کہ شہریوں کو پر سکون ماحول فراہم کیا جائے ۔
گورنر فیصل کریم کنڈی نے اپنے خط میں وزیر اعظم سے مطالبہ کیا ہے کہ وہ فوری طور پر خیبرپختونخوا میں بجلی اور گیس کی لوڈ شیڈنگ کا نوٹس لیں اور اس اہم مسئلے کو فوری حل کیا جائے ۔
خط میں مزید کہا گیا ہے کہ گیس اور بجلی کے مسئلہ کے حل سے کے پی کے باسی بھی دیگر ہم وطنوں کی طرح رمضان میں عبادات پر توجہ مبذول کرسکیں گے ۔
