بھارت کی ریاست اترپردیش کے شہر نوائیڈا میں چوروں کا ایک انوکھا گروپ سامنا آیا ہے جس نے اپنی چوری کے دلچسپ طریقہ واردات سے شہریوں کو خوف کے ساتھ ساتھ حیران بھی کر رکھا ہے۔
بھارتی خبررساں اداروں کے مطابق چوروں کا یہ گروہ گھر میں انوکھے انداز میں ڈکیتی کی واردات کرتا ہے۔چور قیمتی سامان کو چرانے سے پہلے کچن کی جانب جاتے ہیں اور پکوڑے بنا کر کھاتا ہے،اس کے ساتھ ساتھ یہ چوروں کا گروہ فریج میں رکھے ہوئے کھانے کا بھی لطف اٹھاتا ہے اور سکون سے کھا پی کر آرام کرنے کے بعد چوری کرتے ہیں۔بھارتی خبررساں اداروں کے مطابق اس طرح کا واقعہ سیکٹر 25 میں بھی پیش آیا ہے جدھر چوروں نے پہلے پکوڑے بنائے اور ان کو کھانے کے بعد 3 لاکھ بھارتی روپے مالیت کے زیوارت کو لوٹ کر لے گئے۔
نہ صرف یہ بلکہ یہ چور کھانے سمیت پان بھی کھاتا ہے اورچوری والے گھر کے باتھ روم میں تھوک کر بھی جاتا ہے۔پولیس کے مطابق ایک دن میں اس گروہ نے 6گھروں کو لوٹا ہے جہاں پر ایک جیسے ہی طریقہ واردات کو اپنایا گیا ہے، چوروں کے اس گروہ کو پکڑنے کیلئے اسپیشل ٹاسک فورس کو ترتیب دے دیا گیا ہے اور اس کے ساتھ ہی ان کو قانون کی گرفت میں لانے کی بھی کوشش کی جارہی ہے۔
