راولپنڈی:نئے توشہ خانہ کیس میں سابق وزیراعظم او بانی پی ٹی آئی عمران خان اور ان کی اہلیہ بشریٰ بی بی پر فرد جرم عائد کرنے کے لیے تاریخ مقرر کردی گئی۔
اڈیالہ جیل راولپنڈی میں توشہ خانہ ٹو کیس کی سماعت سپیشل جج سینٹرل شاہ رخ ارجمند نے کی، جس میں دونوں ملزمان پر فردجرم عائد کرنے کے لیے 2 اکتوبر کی تاریخ مقرر کر دی گئی ہے۔
سماعت کے دوران بانی پی ٹی آئی اور بشریٰ بی بی کے وکیل کے درخواست ضمانتوں پر دلائل مکمل ہو گئے جب کہ ایف آئی اے کے وکلا ہفتے کے روز سے درخواست ضمانتوں پراپنے دلائل کا آغاز کریں گے۔
دوران سماعت ملزمان اور ایف آئی اے کی جانب سے ان کے وکلا اپنی لیگل ٹیم کے ساتھ عدالت میں پیش ہوئے ۔ اس موقع پر ملزمان بانی پی ٹی آئی اور بشریٰ بی بی کو اڈیالہ جیل میں قائم خصوصی عدالت میں پیش کیا گیا۔
