قومی اسمبلی اجلاس میں وزیر اعظم شہباز شریف اور امیر جے یو آئی مولانا فضل الرحمان کے درمیان دلچسپ جملوں کا تبادلہ ہوا جس کے بعد قومی اسمبلی قہقہوں سے گونج اٹھی ، مولانا فضل الرحمان کی اجازت کے باوجود وزیراعظم نے تنہائی میں کی گئیں باتیں ایوان میں نہیں بتائیں ۔
اسلام آباد: قومی اسمبلی میں وزیراعظم شہباز شریف نے مولانا فضل الرحمان سے تنہائی میں کیا بات کی؟ نہ وزیرِ اعظم نے بتایا نہ مولانا فضل الرحمان نے ۔
قومی اسمبلی کے اجلاس کے دوران وزیر اعظم نے کہا کہ میں نے تنہائی میں مولانا سے جو بات کی، اسے قبر میں لے جاؤں گا لیکن کبھی نہیں بتاؤں گا ۔
وزیراعظم کے خطاب کے بعد مولانا فضل الرحمان نے جواب دیا کہ میں وزیرِ اعظم کو اجازت دیتا ہوں کہ وہ بات ایوان میں بتا دیں، جس پر وزیرِ اعظم نے کہا کہ میں مولانا کی آفر قبول نہیں کروں گا، کیونکہ پھر معاملات اتنے دور چلے جائیں گے کہ واپس نہیں آئیں گے ۔
وزیر اعظم شہباز شریف نے کہا کہ مولانا صاحب، ہم سب کے لیے انتہائی لائق احترام ہیں جبکہ میرے ان سے بہترین تعلقات بھی ہیں اور ہمیشہ شفقت فرماتے ہیں۔ میں اکثر قدم بوسی کے لیے ان کے پاس حاضر ہوتا ہوں ۔
