وزیر داخلہ محسن نقوی نے وزیراعلیٰ خیبرپختونخوا علی امین گنڈاپور سے ملاقات کی اور ضلع کرم میں قیام امن کے لیے ہر ممکن تعاون کی یقین دہانی کرائی ہے۔
تفصیلات کے مطابق وفاقی وزیرداخلہ محسن نقوی کی پشاور میں وزیراعلیٰ آفس آمد پر وزیراعلیٰ خیبرپختونخوا علی امین گنڈاپور نے ان کا خیر مقدم کیا۔ اس موقع پر وزیرداخلہ محسن نقوی اور وزیر اعلیٰ خیبرپختونخوا علی امین گنڈاپور کے درمیان ملاقات ہوئی، جس میں خیبرپختونخوا میں امن و امان کی صورتحال اور کرم میں قیام امن کے لیے اقدامات پر تبادلہ خیال کیا گیا۔
وزیر داخلہ محسن نقوی نے وزیراعلیٰ علی امین گنڈاپور کو قیام امن کے لیے ہر ممکن تعاون کی یقین دہانی کراتے ہوئے کہا کہ خیبرپختونخوا میں قانون نافذ کرنے والے اداروں کی استعداد کار بڑھانے میں پورا تعاون کریں گے، کرم میں قیام امن اولین ترجیح ہے۔
وزیر داخلہ محسن نقوی اور علی امین گنڈاپور نے دہشت گردی کے خلاف جنگ میں قانون نافذ کرنے والے اداروں کے شہدا کو خراج عقیدت پیش کیا اور کہا کہ شہدا ہمارے لیے سرمایہ افتخار ہیں، شہداء کی لازوال قربانیوں کو سلام پیش کرتے ہیں۔
