اسلام آباد کی مقامی عدالت نے ایف آئی اے کی درخواست پر پاکستانیوں کے 27 معروف یوٹیوب چینلز کو بلاک کرنے کا حکم دے دیا، عدالت نے تحریری حکمنامہ میں یوٹیوب کے انچارج افسر کو 27 یوٹیوب چینلز فوری بند کرنے کا حکم دیا ۔
اسلام آباد: جوڈیشل مجسٹریٹ عباس شاہ نے یوٹیوب چینل بلاک کرنے سے متعلق وفاقی تحقیقاتی ادارے (ایف آئی اے) کی درخواست پر سماعت کی ۔
عدالت نے 2 صفحات پر مشتمل تحریری حکم نامہ جاری کرتے ہوئے قرار دیا ہے کہ ریاست مخالف مواد کے حوالے سے ایف آئی اے نے 2 جون کو انکوائری شروع کی، ایف آئی اے کی جانب سے پیش کردہ شواہد سے عدالت مطمئن ہے، قانون کے مطابق کاروائی کر سکتے ہیں ۔
عدالت نے اپنے حکم نامے میں کہا ہے کہ یوٹیوب کے انچارج افسر کو حکم دیا جاتا کہ ہے 27 یوٹیوب چینل بلاک کردیا جائے،ان چینلز میں مطیع اللہ جان، اسد طور، حیدر مہدی، اوریا مقبول، آرزو کاظمی، صدیق جان، عمران ریاض خان، آفتاب اقبال، احمد نورانی سمیت 27 یوٹیوب چینلز شامل ہیں ۔
