لاہور: چیئرمین پی سی بی محسن نقوی نے کہا ہے کہ صائم ایوب سٹائلش زبردست بیٹر اور پاکستان کرکٹ کا اثاثہ ہیں، صائم ایوب کو پہلی دستیاب فلائٹ سے کیپ ٹاؤن سے لندن بھجوایا جائے گا جبکہ اسسٹنٹ کوچ اظہر محمود بھی صائم ایوب کے ساتھ لندن جائیں گے ۔
محسن نقوی نے کہا کہ صائم ایوب کی انجری پر بہت تشویش ہے، صائم ایوب کا دنیا کے بہترین ہسپتال میں چیک اَپ اور علاج کرائیں گے۔ صائم ایوب کے علاج معالجے کے لئے تمام تر وسائل بروئے کار لائے جائیں گے۔ امید ہے کہ صائم ایوب چیمپئنز ٹرافی سے قبل مکمل صحت یاب ہو جائیں گے ۔
چیئرمین پی سی بی کے مطابق صائم ایوب کی لندن کے سپورٹس آرتھو کے ماہر ڈاکٹرز کے ساتھ اپوائمنٹ طے کر لی گٸی ہے۔ پاکستان میں ڈاکٹر ممریز صائم ایوب کے علاج معالجے کے سارے کیس کو دیکھ رہے ہیں۔ ڈاکٹرز نے صائم ایوب کی تمام میڈیکل رپورٹس لندن بھجوا دی ہیں۔
چئیرمین پی سی بی محسن نقوی نے صائم ایوب سے خود رابطہ کیا اور ان کی خیریت دریافت کرتے ہوے صحت یابی کے لئے نیک خواہشات کا اظہار کیا۔
پاکستان کے اوپنر بیٹر کیپ ٹاون میں صائم ایوب دائیں ٹخنے میں فریکچر کے سبب 6 ہفتے تک کرکٹ سے باہر ہو گئے ہیں ۔
صائم ایوب کو یہ فریکچر جنوبی افریقہ کے خلاف دوسرے ٹیسٹ میچ کے پہلے دن فیلڈنگ کرتے ہوئے ہوا تھا ۔
