وزارت خزانہ نے پٹرول اور ڈیزل کی قیمتوں میں معمولی کمی کا نوٹیفکیشن جاری کیا ہے۔
وزارت خزانہ کی طرف سے جاری نوٹیفکیشن کے مطابق آئندہ 15 روز کے لئے پٹرولیم مصنوعات کی نئی قیمتوں میں کمی کی گئی ہے۔جس کے مطابق پٹرول کی نئی قیمت 268 روپے 36 پیسے فی لٹر ہو گئی ہے۔نوٹی فکیشن کے مطابق ڈیزل کی قیمت میں 3 روپے 86 پیسے فی لٹر کمی کے بعد ڈیزل کی نئی قیمت 270 روپے 22 پیسے فی لٹر مقرر کردی گئی ہے۔وزارت خزانہ کی طرف سے مٹی کا تیل بھی ایک روپے 87 پیسے فی لٹر سستا کردیا گیا ہے جس کے بعد اب مٹی کے تیل کی نئی قیمت 171 روپے 61 پیسے فی لٹر ہو گئی ہے۔
نوٹیفکیشن کے مطابق لائٹ ڈیزل 3 روپے 88 پیسے فی لٹر سستا ہونے کے بعد 157 روپے 29 پیسے فی لٹر ہو گیا ہے۔جبکہ قیمتوں میں کمی کے بعد بھی پٹرول اور ڈیزل پر لیوی 60 روپے فی لٹر برقرار رہے گی۔یاد رہے کہ اس سے پہلے وزیراعظم آفس نے پٹرول کی قیمت میں 15 روپے 40 پیسے اور ڈیزل کی قیمت میں 7 روپے 90 پیسے کمی کی سفارش کی تھی تاہم اس پر وزارت خزانہ نے وزیراعظم آفس کی ہدایت کو نظر انداز کردیا اور پٹرول کی قیمت میں 4 روپے 74 پیسے اور ڈیزل کی قیمت میں 3 روپے 86 پیسے فی لٹر کمی کا اعلان کردیا ہے۔
