جماعت اسلامی کا دھرنا مہنگائی اورمہنگے بجلی بلوں کے خلاف دوسرے روز بھی جاری ہے۔
راولپنڈی کے علاقے لیاقت باغ میں جماعت اسلامی نے دھرنا دیا ہوا ہے۔اس دھرنے میں شرکاء کی بڑی تعداد شامل ہے، دھرنے کی انتظامیہ کی طرف سے شرکاء کے لیے خاص طور پر ناشتے کا انتظام کیا گیا ہے۔مہنگائی اور بجلی کے بلوں میں اضافے کے خلاف جماعت اسلامی کے دھرنے میں شامل شرکاء نے مطالبات کی منظوری تک دھرنے کو جاری رکھنے کا اعلان کردیا ہے۔ذرائع کے مطابق امیر جماعت اسلامی حافظ نعیم الرحمن 11 بجے کے قریب دھرنے کے مقام پر پریس کانفرنس سے خطاب بھی کریں گے،جس میں امیر جماعت اسلامی آکر آگے کے لائحہ عمل کے بارے میں بتائیں گے۔
جماعت اسلامی کے دھرنے کی وجہ سے مریڑ حسن سے کمیٹی چوک تک مری روڈ کو مکمل طور پر بند کردیا گیا ہے،جبکہ آج میٹرو بس سروس دوسرے روز بھی بند ہے جس کی وجہ سے شہریوں کو آنے جانے میں شدید مشکلات کا سامنا کرنا پڑرہا ہے۔
دوسری طرف جماعت اسلامی نے حکومت کی مذاکرات کے لئے 3 رکنی کمیٹی کی پیشکش کو قبول کر لیا ہے،جس کے باعث جماعت اسلامی کی قیادت پر مشتمل کمیٹی حکومت سے مذاکرات کرے گی۔یاد رہے کہ حکومت نے جماعت اسلامی سے مذاکرات کرنے کے لئے 3 رکنی کمیٹی کو تشکیل دے دیا ہے،اس کمیٹی میں وفاقی وزیر اطلاعات و نشریات عطاء اللہ تارڑ، طارق فضل چودھری اور امیر مقام شریک ہوگئے۔
