پاک فوج کے شعبہ تعلقات عامہ کی جانب سے جاری بیان میں کہا گیا ہے کہ 30 اپریل اور یکم مئی کو خیبر پختونخوا کے مختلف علاقوں میں سیکیورٹی فورسز کی 3 الگ الگ کارروائیوں کے دوران 5 دہشتگرد ہلاک جبکہ 2 گرفتار کئے گئے ۔
ؤآئی ایس پی آر کے مطابق پہلی کارروائی باجوڑ ضلع میں خفیہ اطلاعات کی بنیاد پر کی گئی، کارروائی کے دوران دہشتگردوں کے ٹھکانے کو مؤثر انداز میں نشانہ بنایا گیا۔
ترجمان پاک فوج نے کہا کہ شدید فائرنگ کے تبادلے کے بعد 3 دہشتگرد مارے گئے، ہلاک دہشتگردوں میں انتہائی مطلوب دہشتگرد فرید اللہ بھی شامل ہے ۔
آئی ایس پی آر نے کہا ہے کہ دوسرا آپریشن شمالی وزیرستان کے علاقے دوسلی میں کیا گیا،اس آپریشن میں فائرنگ کے تبادلے میں 2 دہشتگرد ہلاک کئے گئے ۔
آئی ایس پی آر نے بتایا کہ تیسری کارروائی مہمند ضلع میں کی گئی، سیکیورٹی فورسز نے دہشتگردوں کے ٹھکانے پر کامیاب چھاپہ مارا اور 2 دہشتگردوں کو گرفتار کر لیا، جن میں ایک انتہائی مطلوب دہشتگرد لال امیر عرف ابراہیم شامل بھی شامل ہے ۔
ترجمان پاک فوج نے کہا کہ ان کارروائیوں کے دوران بھاری مقدار میں اسلحہ، گولہ بارود اور دھماکہ خیز مواد بھی برآمد کیا گیا، مارے گئے اور گرفتار دہشتگرد مختلف دہشت گرد سرگرمیوں میں ملوث تھے ۔
بیان میں کہا گیا کہ علاقے میں کلیئرنس آپریشن جاری ہے تاکہ باقی ماندہ دہشتگردوں کو بھی ختم کیا جا سکے، پاک فوج دہشت گردی کے خاتمے کے لیے پرعزم ہے اور ملک کو اس ناسور سے مکمل نجات دلانے کے لیے اپنی جدوجہد جاری رکھے گی ۔
