پشاور: سپیکر بابر سلیم سواتی کی زیر صدارت خیبر پختونخوا اسمبلی کا اجلاس ہوا جس میں حکومتی رکن اسمبلی عبدالسلام نے مشترکہ قرارداد پیش کی ۔
قرارداد میں فوجی عدالتوں کے فیصلوں کو غیر آئینی اور غیر قانونی قرار دیتے ہوئے اس کی مذمت کی گئی ہے ۔
قرارداد میں کہا گیا ہے کہ آئین و قانون کے مطابق شفاف ٹرائل ہر شہری کا حق ہے جبکہ فوجی عدالتوں سے سزائیں سنانا انصاف کا قتل ہے ۔
قرارداد میں کہا گیا ہے کہ وفاق سے سفارش کی جائے کہ فوجی عدالتوں کے فیصلوں کو فوری طور پر واپس لیا جائے ۔
قرارداد کے متن کے مطابق ملٹری کورٹس محب وطن شہریوں کو سزائیں سنارہی ہیں،ملٹری کورٹس کا ٹرائل عام شہریوں کو اپنی حق دفاع سے محروم کرنا ہے ۔
قرارداد میں مطالبہ کیا گیا ہے کہ ملٹری کورٹس اپنی جانبدرانہ،غیر قانونی اور غیر آئینی فیصلوں کو واپس لے، 9 مئی کے حوالے سے ایک شفاف انکوائری کی جائے ۔
خیبرپختونخوا اسمبلی میں قرارداد متفقہ طور پر منظور کی گئی، بعدازاں اسمبلی کا اجلاس کل دوپہر 2 بجے تک ملتوی کردیا گیا ۔
