پشاور: درجہ حرارت میں مسلسل اضافے کے باعث خیبرپختونخوا میں گلیشیئر پھٹنے کا خطرہ منڈلانے لگا ہے، جس سے چترال، سوات اور کوہستان سمیت بالائی علاقوں میں فلیش فلڈ کے خدشات بڑھ گئے ہیں۔
پی ڈی ایم اے خیبرپختونخوا نے اس صورتحال کے پیش نظر الرٹ جاری کرتے ہوئے شہریوں کو غیر ضروری سفر سے گریز کی ہدایت کی ہے۔
ترجمان کے مطابق صوبے کے بیشتر اضلاع میں 31 مئی تک درجہ حرارت میں اضافے کے باعث برف اور گلیشیئرز کے تیزی سے پگھلنے کا امکان ہے، جس سے گلیشیئر جھیلوں کے پھٹنے (GLOF) اور اچانک سیلاب کی صورتحال پیدا ہو سکتی ہے۔
پی ڈی ایم اے ذرائع کے مطابق چترال، دیر، سوات اور کوہستان میں تیز بارشوں جبکہ بعض مقامات پر شدید بارشوں کا بھی امکان ہے۔ درجہ حرارت میں اچانک اضافے اور بارشوں کے باعث ندی نالوں میں طغیانی اور تیز بہاؤ پیدا ہو سکتا ہے، جس سے گاڑیوں اور املاک کو نقصان پہنچنے کا خدشہ ہے۔
پی ڈی ایم اے نے ضلعی انتظامیہ اور متعلقہ اداروں کو حساس علاقوں میں نگرانی بڑھانے، بروقت وارننگ سسٹم فعال رکھنے اور ہنگامی اقدامات یقینی بنانے کی ہدایت جاری کی ہے۔
ریسکیو اداروں کو بھی مشینری اور ضروری سامان تیار رکھنے کا حکم دیا گیا ہے تاکہ کسی بھی ہنگامی صورتحال سے فوری نمٹا جا سکے۔
عوام سے اپیل کی گئی ہے کہ وہ غیر ضروری سفر سے گریز کریں، خطرناک علاقوں میں جانے سے بچیں اور مویشیوں و قیمتی سامان کو محفوظ مقامات پر منتقل کریں۔
ایمرجنسی آپریشن سینٹر مکمل طور پر فعال ہے جبکہ کسی بھی ناخوشگوار واقعے کی صورت میں ہیلپ لائن 1700 پر رابطہ کیا جا سکتا ہے۔
