محکمہ تعلیم خیبر پختونخوا کی جانب سے جاری رپورٹ میں تقریباً 50 لاکھ بچوں کے سکول نہ جانے کا انکشاف ہوا ہے ،رپورٹ کے مطابق 37 فیصد تک بچے بنیادی تعلیم سے محروم ہیں ۔
پشاور:صوبائی محکمہ تعلیم کی جانب سے سکولوں سے باہر بچوں سے متعلق رپورٹ میں کیاگیا ہے کہ صوبے میں 49لاکھ 20 ہزارہ بچے سکول سے محروم ہیں اور یہ تعداد 37 فیصد بنتی ہے ۔
رپورٹ کے مطابق پشاور میں 8 لاکھ سےزیادہ بچے سکولوں سے باہر ہیں جب کہ کولئی پالس کوہستان میں تناسب کے حساب سے سب سے زیادہ 80 ہزار333 بچے سکولوں سے باہر ہیں ۔
محکمہ تعلیم کے مطابق لوئرکوہستان اور اپرکوہستان میں 79 فیصد بچے سکول سےباہر ہیں جب کہ اپرچترال میں سب سے کم 10 فیصد بچےسکولوں سے باہر ہیں ۔
اس حوالے سے وزیر تعلیم خیبرپختونخوا فیصل ترکئی کا کہنا ہے کہ 48 لاکھ سے زائد بچےاوربچیاں سکول سےباہر ہیں، حکومت بچوں اوربچیوں کو سکولوں میں لانے کی کوشش کر رہی ہے ۔
فیصل ترکئی کا کہنا تھا کہ پچھلے سال 13 لاکھ بچوں کو سکولوں میں داخل کرایاگیا اور رواں سال 10 لاکھ بچوں کو سکولوں میں داخل کرنےکا ہدف مقررکیا ہے ۔
