لاہور:پاکستان کے سینئر لیجنڈری اداکار عابد کشمیری 74 سال کی عمر میں علالت کے بعد انتقال کرگئے۔
مرحوم کی بیٹی نے اپنے والد کے انتقال کی اطلاع دیتے ہوئے بتایا کہ عابد کشمیری کچھ عرصہ سے بیمار تھے۔ مرحوم نے اپنے پسماندگان میں دو بیٹے اور دو بیٹیاں سوگوار چھوڑی ہیں۔
عابد کشمیری 4 مئی 1950 کو لاہور میں پیدا ہوئے۔ انھوں نے سیکڑوں ٹی وی ڈراموں، سٹیج اور فلموں میں کام کیا ہے۔ اپنی بے ساختہ مزاحیہ اداکاری کے باعث وہ شائقین کے دلوں پر راج کرتے تھے۔
1988 میں انھیں فلم ’’بازار حسن‘‘ پر بہترین مزاحیہ اداکار کےلیے نگار ایوارڈ دیا گیا،اس کے علاوہ مرحوم کی بہترین فلموں میں جیتے ہیں شان سے اور آہٹ بھی شامل ہیں۔
مرحوم عابد کشمیری کے ٹی وی ڈراموں میں لوہاری گیٹ، سورج کے ساتھ ساتھ، تیسرا کنارہ اور اپنے لوگ سمیت دیگر ڈرامے شامل ہیں، ڈرامہ سمندر میں عابد کشمیری کا کردار گلوبادشاہ بہت مقبول ہوا تھا۔
