لکی مروت میں سکیورٹی فورسز نے خفیہ اطلاع پر آپریشن کیا جس میں11دہشت گردوں کو ہلاک کردیا گیا ہے۔
پاک فوج کے شعبہ تعلقات عامہ آئی ایس پی آر کے مطابق سکیورٹی فورسز نے یہ آپریشن حالیہ آئی ای ڈی دھماکے کے تناظر میں کیا ہے۔ آئی ای ڈی کے کئے گئےدھماکے میں کیپٹن محمد فراز الیاس سمیت 7 فوجی شہید ہو گئے تھے۔ آئی ایس پی آر کے مطابق اس آپریشن کے دوران دہشت گردوں کے متعدد ٹھکانوں کو بھی تباہ کر دیا گیا ہے، سکیورٹی فورسز نے آپریشن کے دوران مؤثر طریقے سے دہشت گردوں کے ٹھکانے کا پتہ لگایا۔
آئی ایس پی آر کے مطابق گھناؤ نے فعل کے تمام ذمہ داروں کو انصاف کے کٹہرے میں لایا جائے گا۔وزیراعظم شہباز شریف نے 11 دہشت گردوں کو ان کے انجام تک پہنچانے پر خراج تحسین پیش کیا ہے۔وزیراعظم کے مطابق پاک فوج کے بہادر جوانوں نے اپنی جانوں کی فکر کئے بغیر دہشت گردوں کے خلاف کامیاب آپریشن کیا ہے۔ وزیراعظم نے اس موقع پر پوری قوم کی جانب سے سکیورٹی فورسز کو خراج تحسین پیش کیا ہے اور کہا ہے کہ ہم پاک فوج کے شہداء اور غازیوں کو سلام پیش کرتے ہیں۔
